ایس آئی ایف سی کا اجلاس، مختلف وزارتوں کے منصوبوں پر پیشرفت کا جائزہ

خصوصی سرمایہ کاری سہولت کونسل ( ایس آئی ایف سی) کی ایگزیکٹو کمیٹی کا دو روزہ  آٹھواں  اجلاس شروع ہوگیا،اجلاس میں مختلف پالیسی سطح  کے اقدامات اور خصوصی سرمایہ کاری سہولت کونسل کے تحت منصوبوں کی پیش رفت کا جائزہ لیا گیا۔

ایس آئی ایف سی کے اجلاس کی صدارت وفاقی وزیر برائے منصوبہ بندی، ترقی اور خصوصی اقدامات نے کی ،متعلقہ وفاقی و صوبائی وزراء اور اعلیٰ سطحی سرکاری حکام نے بھی شرکت کی۔

پہلے روز متعلقہ وزارتوں نے مختلف منصوبوں اور متعلقہ پہلوؤں پر پیشرفت پیش کی اور سرمایہ کاری کے ماحول کو مزید بہتر بنانے کے لیے ٹھوس اقدامات کی سفارشات کی،کمیٹی نے مختلف شعبوں میں مجموعی پیشرفت اور سرمایہ کاروں کے ساتھ مقامی اور عالمی سطح پر اقتصادی روابط کو بھی سراہا۔

کمیٹی نے متحدہ عرب امارات اور  کویت کے ساتھ طے پانے والے مفاہمتی یادداشتوں اور فریم ورک کے معاہدوں کے تحت قابل عمل منصوبوں کو حتمی شکل دینے کے حوالےسے پیشرفت کا جائزہ لیا۔

کمیٹی نے وزارتوں کو ہدایت کی کہ وہ ان معاہدوں کو منافع بخش بنانے کے لیے متعلقہ کام کو تیز کریں۔ کمیٹی نے اہم شعبوں میں حال ہی میں شروع کیے گئے اقدامات پرپیشرفت کا جائزہ لیا اور متعلقہ سٹیک ہولڈرز کو سرمایہ کاری کو راغب کرنے کے لیے بروقت عمل درآمد کی ہدایت کی۔