نگران حکومت نے پراسیکیوشن ڈیپارٹمنٹ پنجاب کو 13 نئی گاڑیاں خریدنے کی اجازت دے دی

 پنجاب کی نگران صوبائی کابینہ نے بھی 9 مئی کے واقعات کو جواز بنا کر پراسیکیوشن ڈیپارٹمنٹ کو نئی گاڑیوں کی خریداری کی اجازت دے دی۔

سیکرٹری پبلک پراسیکیوشن ڈیپارٹمنٹ نے 9 مئی کے واقعات کو جواز بنا کر نئی گاڑیوں کی خریداری کی درخواست کی تھی۔ کیبنٹ کمیٹی برائے فنانس اینڈ ڈویلپمینٹ کے بعد پنجاب کی نگران صوبائی کابینہ نے بھی گاڑیوں کی خریداری کی اجازت دے دی۔

سیکرٹری پبلک پراسیکیوشن ڈیپارٹمنٹ پنجاب عثمان انور نے 9 مئی کے واقعات کی پیروی کو بنیاد بنا کر گاڑیوں کیلئے فنڈز مانگے تھے۔

پبلک پراسیکیوشن ڈیپارٹمنٹ پنجاب نے مستقبل میں گاڑیوں کے مہنگا ہونے کو بھی نئی گاڑیوں کی خریداری کا جواز بنایاتھا۔

نئے مالی سال میں محکمہ خزانہ پنجاب سے 13نئی گاڑیوں کی خریداری کیلئے 6 کروڑ 55 لاکھ روپے فراہم کرنےکی درخواست کی تھی۔

سیکرٹری پراسیکیوشن عثمان انور کے مطابق محکمہ خزانہ پنجاب نے 5 کروڑ55 لاکھ فراہم کرنے پر رضامندی ظاہرکی، 3 جولائی کو ایک کروڑ85 لاکھ مل گئے۔محکمہ خزانہ پنجاب کو بقیہ 3 کروڑ 70 لاکھ فراہم کرنے کا کہا تو سمری ارسال کرنے کی ہدایت کر دی گئی۔

عثمان انور کا موقف ہے کہ 9 مئی کے واقعات کےبعد محکمہ پراسیکیوشن دن رات کام کررہاہے، پراسیکیوٹرز بہت محنت کررہےہیں، کسی بھی مجرم کو سزا کے بغیر نہیں چھوڑنا چاہتے، پراسیکیوشن ڈیپارٹمنٹ کی گاڑیاں بہت پرانی، خستہ اور قومی خزانے پر بوجھ ہیں۔

پراسیکیوشن ڈیپارٹمنٹ کے مطابق موجودہ امن و عامہ کی صورتحال میں محکمہ پراسیکیوشن پنجاب کے پاس نئی گاڑیاں ہونا بہت ضروری ہیں،سمری ارسال کرتے وقت 1300 سی سی گاڑی کی قیمت 24 لاکھ 43ہزار تھی، اب  50 لاکھ 76 ہزارہوچکی ہے،

سیکرٹری پبلک پراسیکیوشن پنجاب کے مطابق گاڑیاں مہنگی ہونےسے قبل نئی گاڑیاں خریدنا بہت ضروری ہے، نگران پنجاب حکومت نے سیکرٹری پبلک پراسیکیوشن پنجاب عثمان انور کی درخواست پر 3 کروڑ 70 لاکھ روپے جاری کرنے کی منظوری دے دی۔