جبری گمشدہ قرار دینے کا معیار اور طریقہ عدالت کو بتایا جائے، سندھ ہائیکورٹ

سندھ ہائیکورٹ میں لاپتہ افراد کی بازیابی سے متعلق درخواستوں کی سماعت کے دوران عدالت نے جبری گمشدگی کے متعلق سوالات اٹھا دیئے،محکمہ داخلہ سندھ نے عدات کو آگاہ کیاکہ وزیر اعلیٰ ہاؤس سے 29 لاپتہ افراد کے اہلخانہ کی مالی معاونت کی منظوری دے دی گئی ہے جس پر عدالت نے ریمارکس دئے کہ  جب تسلیم کرلیا گیا کہ شہری کو جبری گمشدہ کیاگیا ہے تو اسکی وجہ بھی بتائی جائے؟ یہ بھی بتایا جائے کہ شہری کہاں ہیں اور کس ادارے کے پاس ہیں۔عدالت نے  جبری گمشدگی قرار دینے کا معیاراورطریقہ کار سے آگاہ کرنے کی ہدایت کی ۔

سندھ ہائیکورٹ میں لاپتہ افراد کی بازیابی سے متعلق درخواستوں کی سماعت جسٹس نعمت اللہ بھلپوٹو کی سربراہی میں دو رکنی بینچ نے کی۔جے آئی ٹیز نے محمد اقبال، اسماندیم ، شیرمحمدخان کے پیاروں کو جبری گمشدہ قرار دے دیا۔

محکمہ داخلہ سندھ کی رپورٹ پیش کی گئی جس میں بتایا گیا کہ جبری گمشدگی کے بعد ان کے اہلخانہ کی مالی امداد کی منظوری دیدی گئی،وزیر اعلیٰ ہاؤس سے 29 لاپتہ افراد کے اہلخانہ کی مالی معاونت کی منظوری دے دی گئی۔

عدالت نے استفسار کیا کہ جب تسلیم کرلیا گیا کہ شہری کو جبری گمشدہ کیاگیا ہے تو اسکی وجہ بھی بتائی جائے؟یہ بھی بتایا جائے کہ شہری کہاں ہیں اور کس ادارے کے پاس ہیں۔

اسپیشل پبلک پراسیکیوٹر نے کہا کہ جبری گمشدگی قرار دینے کا مطلب یہ ہرگز نہیں کہ کسی ادارے نے شہری کی گمشدگی تسلیم کی ہے۔

عدالت نے ریمارکس دیے کہ بتایا جائے کہ جبری گمشدگی قرار دینے کا معیار اور طریقہ کار کیا ہے،کس قانون کے تحت لاپتہ شہریوں کو جبری گمشدہ قرار دیاجاتا ہے۔

اسپیشل پبلک پراسیکیوٹرنے کہا کہ لاپتہ شہریوں کے متعلق درخواست گزاروں کے الزامات کی روشنی میں اسکا جائزہ لیا جاتاہے؟ اس کے متعلق قانون نہیں ،یہ پریکٹس اسلام آباد ہائیکورٹ کے فیصلے کی روشنی میں شروع ہوئی۔

عدالت نے ہدایت کی کہ اسلام آباد ہائیکورٹ کے فیصلے سمیت اس سلسلے میں جو مواد ہے وہ آئندہ سماعت پر پیش کیا جائے۔

عدالت نے لاپتہ افراد کی بازیابی کے لیے اقدامات تیز کرنے کی بھی ہدایت کی اور پولیس حکام سے پیش رفت رپورٹ بھی طلب کرلی۔