سرمایہ کاروں کا اعتماد متاثر کرنے والی غیرقانونی سرگرمیاں روکنے میں حکومت کی مدد کی جائے گی، پاک فوج

اعلیٰ عسکری قیادت نے اسپیشل انویسٹمنٹ فیسیلیٹیشن کونسل کی چھتری تلے سماجی و اقتصادی نمو کو بلند کرنے کے لیے جاری کوششوں کی مکمل حمایت جاری رکھنے اور معاشی استحکام، ترقی اور سرمایہ کاروں کا اعتماد متاثر کرنے والی تمام غیر قانونی سرگرمیوں کو روکنے میں حکومت کی بھرپور مدد کرنے کا اعادہ کیا۔

جی ایچ کیو میں آرمی چیف جنرل سید عاصم منیر کی زیر صدارت 259ویں کور کمانڈرز کانفرنس (سی سی سی) منعقد ہوئی۔

آئی ایس پی آر کے مطابق فورم نے شہداء کی عظیم قربانیوں کو زبردست خراج تحسین پیش کیا جن میں مسلح افواج کے افسران اور جوانوں، قانون نافذ کرنے والے اداروں اور شہریوں نے ملک کی حفاظت، سلامتی اور علاقائی سالمیت کے لیے اپنی جانوں کا نذرانہ پیش کیا۔

شہداء کے ایصال ثواب کے لیے فاتحہ خوانی کی گئی اور اس عزم کا اعادہ کیا گیا کہ ریاست پاکستان اور مسلح افواج شہداء اور ان کے اہل خانہ کو انتہائی عزت و تکریم سے نوازتے رہیں گے۔

6 ستمبر کو ملک بھر میں یوم دفاع و شہدا کی تقریب کو معاشرے کے تمام طبقات نے سراہا جس پر افواج پاکستان ہماری قابل فخر قوم کی ہمیشہ مشکور ہیں۔

شرکاء نے ہر قسم کے بالواسطہ اور بلاواسطہ خطرات کے خلاف پاکستان کی خود مختاری اور علاقائی سالمیت کے دفاع کے لیے پاک فوج کے عزم کا اعادہ کیا۔

فورم نے اس بات کا اعادہ کیا کہ ریاستی اداروں اور عوام کے درمیان دراڑ پیدا کرنے کے لیے نفرت انگیز پروپیگنڈہ کرنے والوں کی مایوس کن کوششیں ان کی بڑھتی ہوئی مایوسی کا مظہر ہیں اور ایسے عناصر کی مزید تذلیل ہی ہوگی۔

شرکاء کو موجودہ جیو اسٹریٹجک ماحول، قومی سلامتی کو درپیش چیلنجز اور بڑھتے ہوئے خطرے کے جواب میں اپنی حکمت عملی کے بارے میں بریفنگ دی گئی۔

فورم نے فیصلہ کیا کہ پاکستان کو غیر مستحکم کرنے کے لیے دشمن قوتوں کے کہنے پر کام کرنے والے تمام دہشت گردوں، ان کے سہولت کاروں اور ان کی حوصلہ افزائی کرنے والوں سے ریاست کی پوری طاقت سے نمٹا جائے گا۔

پائیدار امن اور ترقی کے لیے بلوچستان کے نئے ضم شدہ اضلاع اور سرحدی اضلاع کی اقتصادی صلاحیت کی تیز رفتار ترقی کی ضرورت پر بھی زور دیا گیا۔

چیف آف آرمی سٹاف نے آپریشنز کے دوران پیشہ ورانہ مہارت اور حوصلہ افزائی کے اعلیٰ معیار کو برقرار رکھنے اور فارمیشنوں کی تربیت کے دوران بہترین کارکردگی کے حصول پر زور دیا۔ انہوں نے اپنے فوجیوں کی فلاح و بہبود اور حوصلے کو برقرار رکھنے پر مسلسل توجہ دینے پر کمانڈروں کی تعریف کی جو فوج کی آپریشنل تیاری کی بنیاد ہے۔