جنرل ریٹائرڈ قمر باجوہ اور فیض حمید کے خلاف اندراج مقدمہ کے لیے درخواست پر سماعت ملتوی

سابق آرمی چیف جنرل قمر جاوید باجوہ کے خلاف ریٹائرمنٹ کے بعد قانونی رکاوٹ توڑنے اور مختلف ایونٹس کو غلط بیان کرنے پر اندراج مقدمہ کی درخواست کی سماعت اسلام آباد ہائیکورٹ میں ہوئی۔

چیف جسٹس عامر فاروق نے شہری عاطف علی کی درخواست پر سماعت کی، جنرل قمر جاوید باجود کی جانب سے بیرسٹر عمر اعجاز گیلانی عدالت کے سامنے پیش ہوئے۔

درخواست گزار نے آج کیس ملتوی کرنے کی استدعا کی اور درخواست گزار کی جانب سے بتایا گیا کہ سینیر وکیل راجہ رضوان عباسی موجود نہیں۔

عدالت نے بغیر کاروائی آگے بڑھائے کیس کی سماعت غیر معینہ مدت کے لیے ملتوی کر دی۔

شہری نے جنرل باجوہ ، جنرل فیض و دیگر کے خلاف ایف آئی اے میں مقدمہ اندراج کی درخواست دائر کر رکھی ہے۔