آئی سی سی چیمپیئنز ٹرافی، پاک بھارت ٹاکرا یکم مارچ کو ہوگا

بھارتی میڈیا نے رپورٹ کیا ہے کہ آئی سی سی چیمپئنز ٹرافی میں پاک بھارت ٹاکرا یکم مارچ کو شیڈول ہے،پاکستان اور بھارت کے درمیان میچ لاہور کے قذافی اسٹیڈیم میں شیڈول کیا گیا ہے۔

بھارتی میڈیا کا کہنا ہے کہ پی سی بی نے کچھ روز پہلے چیمپئنز ٹرافی کا ڈرافٹ شیڈول آئی سی سی کے ساتھ شیئرکیا تھا،پی سی بی کے ڈرافٹ شیڈول کی تاحال بھارتی کرکٹ بورڈ نے منظوری نہیں دی۔

بھارتی میڈیا رپورٹ کے مطابق سکیورٹی اور لاجسٹکل مسائل کی وجہ سے بھارت کے تمام میچز لاہور میں کرانے کی تجویز دی گئی،ڈرافٹ شیڈول کے مطابق گروپ اے میں پاکستان ،بھارت سمیت بنگلہ دیش اور نیوزی لینڈ شامل ہیں،گروپ بی میں انگلینڈ، جنوبی افریقہ، آسٹریلیا اور افغانستان کو رکھا گیا ہے۔

بھارتی میڈیا کا کہنا ہے کہ چیمپئنز ٹرافی کیلئے تمام ممبرز ممالک نے آئی سی سی کو اپنی سپورٹ کی تصدیق کرا دی ہے،چیمپئنز ٹرافی پر بی سی سی آئی حکومت سے مشاورت کے بعد فیصلہ کرے گی۔
چیمپئنز ٹرافی کیلئے 19 فروری سے 9 مارچ تک کی تاریخ تجویز کی گئی ہے،10 مارچ چیمپئنز ٹرافی کے لئے ریزرو ڈے کے طور پر رکھا گیا ہے۔