خیبرپختونخوا حکومت نے بلوچستان میں دہشتگردوں کے ہاتھوں شہید ہونے والوں کے ورثا کے لیے امدادی پیکج کا اعلان کردیا

خیبرپختونخوا حکومت نے بلوچستان میں دہشتگردی کے حالیہ واقعات میں شہید ہونیوالے افراد کے ورثاءکیلئے خصوصی پیکج کا اعلان کردیا ہے، متاثرہ خاندانوں کو شہداءپیکج کے تحت 10،10لاکھ روپے دیئے جائینگے۔

خیبرپختونخوا حکومت نے گزشتہ روز بلوچستان میں دہشتگردی کے واقعات میں شہید کئے جانے والے افراد کیلئے خصوصی امدادی پیکج کا اعلان کیا ہے، مشیر خزانہ خیبرپختونخوا مزمل اسلم کے مطابق وزیراعلیٰ علی امین گنڈا پور نے شہداءکے ورثاءکیلئے 10،10لاکھ روپے امداد دینے کا فیصلہ کیا ہے جبکہ شمالی وزیرستان میں گزشتہ روز دھماکے میں شہید ہونیوالے افراد کو بھی امدادی پیکج دیا جائیگا۔

مزمل اسلم کا کہنا ہے کہ خیبرپختونخوا حکومت دہشت گردی کے واقعات کی مذمت کرتی ہے،چیئرمین عمران خان اور وزیراعلیٰ علی امین گنڈا پورنے حالیہ دہشتگردی کے واقعات پر سخت رنج و غم کا اظہار کیا ہے، خیبرپختونخوا کی حکومت اور عوام ان جیسے واقعات کی رنج و الم سے بخوبی واقف ہیں، شہید ہونے والے افراد کے ورثاءکو تنہا نہیں چھوڑا جائیگا۔