وزارت قانون نے ریویو آف ججمنٹس اینڈ آرڈرز ایکٹ کالعدم قرار دینے کے خلاف نظرثانی کی درخواست دائر کردی

وزارت قانون نے  ریویو  آف ججمنٹس اینڈ آرڈرز ایکٹ کو  کالعدم قرار دینے کے سپریم کورٹ کے فیصلے کے خلاف  نظر ثانی کی درخواست دائر کردی ۔۔

درخواست میں عدالت عظمٰی سے 11 اگست کے فیصلے پر نظرثانی کی استدعا کی گئی ہے، نظرثانی درخواست میں اضافی دستاویزات کیلئے 15 روز کی مہلت طلب کی گئی۔

ذرائع کا کہنا ہے کہ رجسٹرار آفس نے اضافی دستاویزات کیلئے 15 روزکا وقت دے دیا،سپریم کورٹ نے 11 اگست کو ریویو آف ججمنٹس اینڈ آرڈرز قانون کالعدم قرار دیا تھا۔

سپریم کورٹ نے ریویو ایکٹ کو پارلیمان کی قانون سازی کے اختیار سے تجاوز قرار دیا تھا،ریویو ایکٹ میں آرٹیکل 184(3) کے مقدمات کے فیصلے کے خلاف متاثرہ فریق کو اپیل کا حق دیا گیا تھا۔

چیف جسٹس عمر عطا بندیال، جسٹس اعجاز الاحسن اور جسٹس منیب اختر پر مشتمل تین رکنی بینچ نے فیصلہ سنایا تھا،ریویو آف ججمنٹس اینڈ آرڈرز اینڈ ایکٹ سے متعلق کیس میں جسٹس منیب اختر نے اضافی نوٹ بھی تحریر کیا تھا۔