وزیراعظم نے بجلی کمپنیوں کو صوبوں کے حوالے کرنے کی تجویز پر جائزہ کمیٹی بنادی

وزیراعظم شہباز شریف نے بجلی کمپنیوں کو صوبوں کے حوالے کرنے کی تجویز پر جائزہ کمیٹی تشکیل دے دی اور  نجکاری کے عمل میں حائل رکاوٹیں جلد سے جلد دور کرنے کی ہدایت کی ہے۔

وزیراعظم کی زیرصدارت نجکاری سے متعلق اعلیٰ سطح کااجلاس ہوا۔وزیراعظم شہبازشریف نےکہا کہ نجکاری کی عمل میں حائل رکاوٹیں جلد ازجلد دور کی جائیں تاکہ ملک وقوم کو اربوں روپے کے خساروں سے نجات ملے۔

وزیراعظم نے ہدایت کی کہ نجکاری کے ذمہ دار اداروں کی صلاحیت بڑھانے اور مطلوبہ استعداد حاصل کرنے کے فوری اقدامات کئے جائیں، تاکہ معیشت کی بحالی اور عوام کو ریلیف کی فراہمی کا عمل تیز ہو۔

اجلاس میں بجلی کمپنیوں کو صوبوں کے حوالے کرنے کی تجویز پر جائزہ کمیٹی کی تشکیل دی گئی، کمیٹی وزیراعظم کواپنی تجاویز پیش کرے گی۔

وزیراعظم نے نجکاری کے عمل میں شامل تمام اداروں کی مکمل فہرست اورپیش رفت کی رپورٹ طلب کرلی۔

وزیراعظم نے ہدایت کی کہ  وقت کے واضح تعین کے ساتھ اقدامات اور اہداف کی تفصیل پیش کی جائے، کابینہ کی تشکیل کے ساتھ ہی پرائیویٹائزیشن سے متعلق زیرالتوا حل طلب مسائل پیش کئے جائیں۔