اڈیالہ جیل کی سکیورٹی مزید سخت، اطراف میں ناکہ بندی، اضافی نفری تعینات

سیکورٹی تھریٹ کے پیش نظر اڈیالہ جیل کے اطراف میں سیکورٹی مزید سخت کردی گئی جبکہ جیل سے متصل اڈیالہ روڈ پر پولیس ناکے قائم کرکے آنے جانے والوں پر کڑی نظر رکھی جارہی ہے۔

اڈیالہ جیل کی سکیورٹی میں مزید غیر معمولی اضافہ کر دیا گیا ہے۔ جیل کے باہر خار دار تاروں کی تنصیب شروع کردی گئی ہے۔

جیل سے باہر اور اطراف کے ایریا میں پولیس کی اضافی نفری کو بھی تعینات کر دیا گیا ہے۔ جیل سے متصل اڈیالہ روڈ پر ناکے قائم کرتے ہوئے جیل کے مرکزی دروازے پر ملاقاتوں پر پابندی کے بینرز آویزاں کر دیئے گئے ہیں۔

انتظامیہ کی جانب سے اڈیالہ جیل سے متصل سڑک پر خار دار تاروں کی فینسنگ کا کام تیزی سے مکمل کیا جارہا ہے۔جیل کے باہر غیر متعلقہ افراد اور گاڑیوں کو رکنے کی اجازت نہیں ہے اسی طرح اڈیالہ جیل میں صرف متعلقہ افراد کو جانے کی اجازت ہے۔

جیل حکام کے مطابق سیکورٹی کے پیش نظر میڈیا کی سیٹلائٹ گاڑیوں کو اڈیالہ جیل سے دو کلومیٹر دوری کے فاصلے پر کھڑے ہونے کی اجازت ہوگی۔