دہشتگردی کا منبع افغانستان میں ہے، بارڈر پر تمام بین الاقوامی قوانین و روایات نافذ کرنا ہوں گی، وزیر دفاع

وزیر دفاع خواجہ آصف نے کہا ہے  پاکستان میں دہشتگردی کا منبع افغانستان میں ہے، دہشت گردی کے واقعات میں اضافہ کے پیش نظر بارڈر کی صورتحال میں بنیادی تبدیلی کی ضرورت ہے۔

سماجی رابطے کے پلیٹ فارم ایکس پر بیان میں وزیر دفاع خواجہ آصف نے کہا کہ ہماری کوششوں کے  باوجود کابل اس سمت کوئی پیش رفت نہیں کر رہا۔ دہشتگردی کے ٹھکانے انکے علم میں ہونے کے باوجود انکی سرزمین سے پاکستان کے خلاف دہشت گرد آزادانہ آپریٹ کر رہے ھیں۔

خواجہ آصف نے کہا  پاک افغان بارڈر ساری دنیا کی روایتی بارڈر سے مختلف ہے- موجودہ حالات میں جب کابل سے تعاون میسر نہیں، پاکستان کو اس بارڈر پہ تمام بین الاقوامی قوانین اور روایت نافذ کرنا ہوں گے۔بارڈر پر دہشتگردوں کی ٹریفک ختم کرنی ہو گی۔

وزیر دفاع نے کہا  اس طرح دونوں ممالک روایتی اچھے ہمسایوں کیطرح اپنے تعلقات کو فروغ دے سکتے ہیں۔پاسپورٹ اور ویزہ کے ذریعے سفر کی سہولتیں جاری رکھی جاسکتی ہیں۔