سپریم کورٹ نے مبارک ثانی کے نظرثانی کیس میں فیصلے کے حوالے سے وضاحت جاری کردی

سپریم کورٹ نے مبارک ثانی نظر ثانی فیصلے کے حوالے سے وضاحت جاری کردی،سپریم کورٹ اعلامیہ کے مطابق فیصلے میں حضرت محمد صلی اللہ علیہ و سلم پر غیر مشروط اور کامل ایمان کے بغیر مسلمان نہیں ہوسکتا، احمدی کہلانے والے دونوں گروہ شریعت آئین و قانون کے مطابق غیر مسلم ہیں، ،،احمدی کہلوانے والوں کو عوامی یا نجی سطح پر مسلمانوں میں اپنا عقیدہ پھیلانے کا حق نہیں۔

سپریم کورٹ کے اعلامیہ میں کہا گیا کہ عدالت نے دوران سماعت جید علماء کرام سے رائے لی تھی،عدالت میں بار بار طلبی کے باوجود معاونت کے لیے پیش نہ ہونے والوں کی جانب سے الزام تراشی کا آغاز ہو چکا ہے۔

سپریم کورٹ اعلامیہ میں کہا گیا کہ ایسے افراد کا اپنی رائے کو جید علماء کرام سے معتبر بنا کر پیش کرنا غیر مناسب ہے،آئین شہریوں کو اظہارِ رائے کی آزادی کا حق دیتا ہے مگر اسے اسلام کی عظمت یا ملک کی سالمیت کو نقصان پہنچانے کے لیے استعمال نہیں کیا جا سکتا۔

سپریم کورٹ اعلامیہ میں کہا گیا کہ فیصلے کو غلط مفہوم پہنا کر پراپیگنڈہ کرنا ملک و قوم کی خدمت نہیں بلکہ فساد فی الارض کے زمرے میں آتا ہے،اسلام اور آئین و قانون میں ہنگامہ آرائی کی اجازت نہیں ہے۔