قذافی سٹیڈیم کی اپ گریڈیشن کا کام شروع، مرکزی عمارت گرا کر نئی بنائی جائے گی

قذافی اسٹیڈیم میں اپ گریڈیشن کے حوالے سے کام شروع کردیا گیا، ذرائع کے مطابق قذافی اسٹیڈیم کی اپ گریڈیشن کے کام کے پہلے مرحلے میں مین بلڈنگ سے دفاتر کی منتقلی کا کام شروع کیا گیا ہے، جس میں تمام ڈائریکٹرز اور ان کے شعبوں کو فار اینڈ بلڈنگ اور نیشنل کرکٹ اکیڈمی منتقل کیا جا رہا ہے، آئندہ ہفتے کے دوران دفاتر کی منتقلی کا کام مکمل کیا جائے گا جس کے بعد مین بلڈنگ کو گرانے کا منصوبہ تیار ہے۔

ذرائع کا کہنا ہے کہ مین بلڈنگ کی نئی عمارت کو جدید طرز پر گراؤنڈ کے قریب بنانے کا پلان تیار کیا گیا ہے،مین بلڈنگ میں زیادہ تر ہوسپیٹلیٹی باکسز فرنٹ پر بنانے کا منصوبہ ہے۔

ذرائع نے بتایا کہ قذافی اسٹیڈیم کے پریمئیر انکلوژرز عمران خان اور فضل محمود میں سیٹوں کی گنجائش بھی بڑھائی جائے گی،منصوبے کے مطابق شائقین کو بہتر ویو دینے کے لیے نئی اسکرینیں بھی نصب کی جائیں گی۔

ذرائع نے کہا کہ چیئرمین پی سی بی محسن نقوی کی ہدایت کے مطابق قذافی اسٹیڈیم کے ساتھ پنڈی کرکٹ اسٹیڈیم اور کراچی کے نیشنل کرکٹ ارینا کو بھی اپ گریڈ کیا جائے گا،اپ گریڈیشن کا کام چیمپئینز ٹرافی 2025 مدِ نظر رکھتے ہوئے کیا جا رہا ہے۔

اپ گریڈیشن کے لیے غیر ملکی کنسلٹنٹ اور ڈیزائنرز کی خدمات لی گئی ہیں،اپ گریڈیشن کے دوران انٹرنیشنل میچز کے لیے پلان بھی تیار کیا جا رہا ہے۔