کمسن گھریلو ملازمہ پر جج کی بیوی کا تشدد، رضوانہ اور اس کے والد کے بیانات ریکارڈ کر لیے، اسلام آباد پولیس

اسلام آباد پولیس کا کہنا ہے کہ سول جج کے گھر تشدد کا نشانہ بننے والی کمسن گھریلو ملازمہ اور اس کے والد کا بیان ریکارڈ کر لیا گیا ہے، ملزمہ نے یکم اگست تک ضمانت لے رکھی ہے۔

ترجمان اسلام آباد پولیس کا کہنا ہے کہ کمسن گھریلو ملازمہ 14 سالہ رضوانہ پر تشدد کی مصدقہ میڈیکل رپورٹ ابھی تک نہیں مل سکی۔ بچی اور اس کے والد کے بیانات ریکارڈ کر لیے گئے ہیں۔

ترجمان اسلام آباد پولیس کا کہنا ہے کہ سول جج کی اہلیہ ملزمہ سمیہ عاصم حفیظ نے یکم اگست تک ضمانت حاصل کررکھی ہے۔

ترجمان اسلام آباد پولیس نے کہا کہ جرم میں شریک تمام افراد کی چھان بین کی جارہی ہے، تمام کارروائی قانون کے مطابق عمل میں لائی جارہی ہے۔

ترجمان اسلام آباد پولیس نے عوام سے اپیل کی کہ چائلڈ لیبر قانوناً جرم ہے، ایسے کسی بھی واقعہ کا کسی کو علم ہو تو پکار 15 پر پولیس کو اطلاع دیں۔