کراچی میں اگلے 3 روز موسم گرم اور خشک رہنے کی توقع

بلوچستان سے گذرنے والی ہلکی شدت کے مغربی ہواؤں کی لہر کے سبب دیہی سندھ کے کچھ اضلاع میں گرج چمک کے ساتھ ہلکی بارش کا امکان،باقی ماندہ صوبے میں موسم گرم وخشک رہنے کا امکان ہے۔

محکمہ موسمیات ارلی وارننگ سینٹر پیش گوئی کے مطابق  ہلکی شدت کی مغربی ہواوں کی لہر بلوچستان سے گذررہی ہے، سسٹم کے زیراثرآج شام/رات جیکب آباد،شکار پور،قمبر شہداد کوٹ اور لاڑکانہ کے اضلاع میں گرج چمک کے ساتھ ہلکی بارش کا امکان ہے۔

صوبے کے دیگر اضلاع میں موسم گرم وخشک رہنے کا امکان ہے،کراچی میں آئندہ 3 روز تک موسم گرم وخشک رہنے کی توقع ہے۔

 اس دوران زیادہ سے زیادہ درجہ حرارت 35 سے 37 ڈگری کے درمیان رہنے کا امکان ہے،اگلے چندروز تک شہر میں دوپہر کے وقت بلوچستان کی ہوائیں چلنے کی توقع ہے۔

واضح رہے کہ کراچی میں صبح کے وقت خنکی شروع ہوگئی،آج صبح کراچی کا کم سے کم درجہ حرارت گذشتہ روز کے مقابلے میں 2 ڈگری کمی سے 21.5 ڈگری سینٹی گریڈ ریکارڈ ہوا۔