30 جون سے ملک کی سیاست میں بڑی تبدیلی آئے گی، شیخ رشید

شیخ رشید احمد کہتے ہیں حکومت کا انجن دھواں دے رہا ہے، 30 جون سے سیاست میں بڑی تبدیلی آئے گی، 9 مئی واقعہ پر سب کہہ رہے ہیں کہ جوڈیشل کمیشن بننا چاہئے۔

راولپنڈی میں دہشتگردی عدالت کے باہر میڈیا سے گفتگو کرتے ہوئے شیخ رشید احمد کا مزید کہنا تھا کہ میرا تعلق بانی پی ٹی آئی سے ہے، میں پی ٹی آئی میں شامل نہیں ہوں، مہنگائی کے خلاف لوگ ایسے ہی نکلیں گے جیسے کشمیر اور راولا کوٹ میں نکلیں ہیں۔

انہوں نے کہا کہ ہم نو مئی مقدمات کا سامنا کر کر کے تھک گئے ہیں، بہتر ہے اب سزائیں دیں اور جان چھڑائیں، ہمارے گھروں پر چھاپے مارے جارہے ہیں، ہم پر کوئی شہادت نہیں ہے، میں نے ابھی اسلام آباد کی تین عدالتوں میں پیش ہونا ہے، بے نظیر بھٹو ٹھیک تھیں اس نے ہمیں فوری سزا دی، اس ملک میں انصاف کا مذاق بنایا جارہا ہے، انصاف کا پوسٹ مارٹم کیا جارہا ہے، لوگوں کو عدلیہ سے انصاف کی امید ہے۔