قومی ٹیم میں واپس آنے کے لیے یہ ٹورنامنٹ میرے لیے اہم ہے، حسن علی

کراچی کنگز کے حسن علی نے کہا ہے کہ قومی ٹیم میں واپس آنے کے لیے یہ ٹورنامنٹ میرے لیے بہت اہم ہے، میرے لیے بہت اچھا موقع ہے کہ پی ایس ایل میں پرفارم کرکے قومی ٹیم میں جگہ بنا سکوں۔

کراچی میں میڈیا سے بات چیت میں حسن علی نے کہا کہ یہ ورلڈ کپ کا سال ہے اور میں ورلڈکپ کھیلنا چاہتا ہوں، عالمی کپ سے پہلے دو سیریز ہیں اس میں بھی پرفارم کرنا چاہتا ہوں، میں چاہتا ہوں کہ اپنی کارکردگی سے سیلیکٹر کی توجہ حاصل کرسکوں۔

پی ایس ایل کے میچز کے حوالے سے حسن علی کا کہنا تھا کہ پی ایس ایل کے آخری 2 میچز ہم بہت کلوز جا کر ہارے ہیں، جبکہ اگلا میچ جیتنے کی کوشش کریں گے۔

حسن علی کا کہنا تھا کہ اننگ میں انیسواں اور بیسواں اوور بہت اہم ہوتا ہے، ہر ٹیم سے ڈیتھ اوورز میں مس کیلکولیشن ہورہی ہے۔

کراچی کنگز کی ٹیم کے کھلاڑیوں میں وائرل انفیکشن سے متعلق حسن علی نے بتایا کہ ٹیم وائرل انفیکشن کا شکار ہوگئی تھی، پیٹ کے امراض میں مبتلا تمام کھلاڑی فٹ ہوچکے ہیں، کوئٹہ کیخلاف میچ میں میر حمزہ سمیت چاروں کھلاڑیوں کی کمی محسوس ہوئی۔

اپنے اگلے میچ سے متعلق حسن علی کا کہنا تھا کہ اتوار کو ملتان سلطان کے خلاف میچ جیتیں گے، میچ کے اہم موقع پر کچھ غلطیاں ہورہی ہیں، افتخار احمد فارم میں ہیں انہیں آؤٹ کرنے کے لیے اچھی بولنگ کرنی ہوگی۔