اسلام آباد ہائیکورٹ کے ججز کو دھمکی آمیز خط، سی ٹی ڈی میں مقدمہ درج

اسلام آباد ہائی کورٹ کے ججز کو مشکوک مشکوک خطوط اور انتھراکس پاؤڈر بیجھنے پر تھانہ سی ٹی ڈی میں مقدمہ درج کرلیا گیا۔ مقدمہ دہشتگردی دفعات کے تحت درج کیا گیا ہے۔

اسلام آباد ہائی کورٹ کے چیف جسٹس عامر فاروق سمیت آٹھ ججز کو مشکوک خطوط بیجھے گئے تھے۔

ایف آئی آر کے متن کے مطابق تحریک ناموس پاکستان کا حوالہ دے کر جسٹس سسٹم کو تنقید کا نشانہ بنایا گیا،دھمکی کے لیے مخصوص شکل اور انگریزی لفظ Bacilus Anthracis استعمال کیا گیا۔

مقدمہ ہائی کورٹ کے بیلف قدیر احمد کی مدعیت میں درج کیا گیا، ایف آئی آر کے مطابق بیلف قدیر نے بتایا کہ تمام ججز صاحبان کے نام لیٹر میں نے تقسیم کروائے۔تمام لیٹرز ریشم خاتون زوجہ وقار حسین نامکمل ایڈریس کے نام سے موصول ہوئے۔

ایف آئی آر کے مطابق عدالتی اہلکار قمر خورشید نے فون پر بتایا خطوط نہ کھولے جائیں اس میں کیمیکل ہے، عدالتی اہلکار کی اطلاع کے بعد تمام ریڈروں کو بھی لفافہ نہ کھولنے کی ہدایت کی گئی۔

ایف آئی آر کے مطابق ریشم اور نامعلوم افراد نے مقدمات پر اثرانداز ہونے کی کوشش کی، پولیس کو مشکوک خطوں سے متعلق تمام صورتحال سے آگاہ کیا گیا۔4 خط کھولے گئے، سفید پاؤڈر کی آمیزس پائی گئی۔