حلف لینا ہے یا نہیں، کل پارلیمانی پارٹی اجلاس میں فیصلہ کریں گے، اسد قیصر

پی ٹی آئی رہنما اسد قیصر نے کہا ہے کہ ہم مشترکہ طور پرآئندہ کا لائحہ عمل طے کریں گے، لیول پلیئنگ فیلڈ اور قانون کی حکمرانی چاہتے ہیں، بند کمروں کے فیصلوں کو تسلیم نہیں کریں گے، حلف اٹھانے کے حوالے سے کل پارلیمانی پارٹی اجلاس میں فیصلہ ہوگا۔

اڈیالہ جیل کے باہر میڈیا سے گفتگو کرتے ہوئے اسد قیصر نے مزید کہا کہ عمران خان سے آج بہت اچھی ملاقات ہوئی ہے، اختر مینگل اور دیگر سیاسی جماعتوں کے ساتھ مل کر بات کرنی کی ہدایت کی گئی ہے، ہمارا ون پوائنٹ ایجنڈ ہے کہ انتخابات میں دھاندلی کا مکمل اور مستقل خاتمہ ہو، جی ڈی اے، تحریک لبیک پاکستان اور دیگر سیاسی جماعتوں کے ساتھ بات کریں گے۔

اسد قیصر نے کہا کہ مریم نواز جو کل وزیراعلی بنی ہے اس کو کون مانے گا، لوگوں کو زبردستی ساتھ ملایا گیا، ہم چاہتے ہیں کہ لیول پلیئنگ فیلڈ سب کو ملے اور عوام کے مینڈیٹ کا احترام کیا جائے، ہم چاہتے ہیں کہ ٹیکنالوجی کا استعمال کیا جائے اور پوری دنیا میں ایسا ہوتا ہے، ہماری جدوجہد قانون اور آئین کے مطابق ہے، لوگوں سے درخواست ہے پرامن احتجاج کریں۔