حکومت کس کو دینی ہے، فیصلہ پارلیمنٹ کرے گی، وزیراعظم انوار کاکڑ

نگران وزیراعظم انوارالحق کاکڑ نے کہا ہے کہ خواہش ہے حکومت سازی کا عمل جلد مکمل ہو،اب تک کے نتائج کے مطابق ایک مخلوط حکومت بنتی نظر آرہی ہے۔

نگران وزیراعظم انوارالحق کاکڑ نے ترکی کے نیوز ٹی وی ٹی آر ٹی ورلڈ کے پروگرام دی نیوز میکرز میں گفتگو کرتے ہوئے کہا کہ آئندہ پارلیمنٹ نے فیصلہ کرنا ہے کہ حکومت کس کو دینی ہے،سادہ اکثریت جو بھی ظاہر کرے گا، وہ حکومت بنائےگا۔

نگران وزیراعظم نے کہا کہ حکومت کی بنیادی  ذمہ داری عوام کا تحفظ اور سلامتی ہے،ملک کو دہشت گردی کے خطرات کا سامنا ہے،دہشت گردی کی کارروائی روکنے کا مؤثر طریقہ مواصلاتی ذرائع کو منقطع کرنا ہے۔

انوارالحق کاکڑ نے کہا کہ عوام نے پرامن طریقےسےاپنے ووٹ کا حق استعمال کیا،2صوبوں میں دہشت گردی کے واقعات کے باوجود ووٹ ڈالنے کا تناسب بہت اچھا رہا،غیر معمولی حالات میں بڑی تعداد کا انتخابی عمل میں حصہ لینا جمہوریت کی مضبوطی کاعکاس ہے۔

نگران وزیراعظم نے کہا کہ آئین اور قانون کے مطابق سیاسی جماعتوں میں جمہوری عمل ضروری ہے،عدالتی فیصلے نے یہ واضح کردیا کہ سیاسی جماعتوں کو جمہوری عمل سے گزرنا ہوگا،عدالتی فیصلے کے نتیجے میں ملک میں جمہوریت مزید فعال اور مضبوط ہوگی،خواہش ہے حکومت سازی کا عمل جلد مکمل ہو،اب تک کے نتائج کے مطابق ایک مخلوط حکومت بنتی نظر آرہی ہے۔