چین کے صدر کو بتا دیا آپ کی معیشت مغرب کے سرمائے پر چلتی ہے، محتاط رہیں، صدر بائیڈن

امریکی صدر جو بائیڈن نے کہا ہے کہ جب صدر شی جن پنگ نے روس کے صدر ولادیمیر پیوٹن سے ملاقات کی تو اس کے بعد میں نے ان سے کہا تھا کہ محتاط رہیں، چین کا انحصار مغربی سرمایہ کاری پر ہے۔ میں نے کہا یہ دھمکی نہیں، یہ ایک آبزرویشن ہے۔

امریکی ٹی وی سی این این سے انٹرویو میں صدر بائیڈن نے کہا کہ میں نے صدر شی جن پنگ سے کہا کہ جب سے روس نے یوکرین پر حملہ کیا ہے، 600 امریکی کمپنیوں نے روس سے کاروبار سیٹ کر سرمایہ نکال لیا، آپ نے خود مجھے بتایا کہ آپ کی معیشت یورپ اور امریکا سے سرمایہ کاری پر انحصار کرتی ہے،اس لیے محتاط رہیں، بہت محتاط رہیں۔

صدر پیوٹن اور صدر شی جن پنگ نے مارچ میں ملاقات کی تھی اور چین اور روس کے درمیان گرمجوش دوستی کی بات کے ساتھ مغرب پر کڑی تنقید کی تھی۔

امریکا اور چین کے درمیان کشیدگی عروج پر ہے اور دونوں ملکوں کے درمیان قومی سلامتی معاملات، تائیوان، یوکرین جنگ، چین کی ٹیکنالوجی پر امریکی پابندیوں اور چین کی صنعتی پالیسیوں کے ایشوز اہمیت کے حامل ہیں۔ امریکی وزیر خزانہ جینیٹ ییلن اس وقت بیجنگ کے دورے پر ہیں۔

امریکی صدر سے پوچھا گیا کہ ان کی بات پر چین کے صدر کا ردعمل کیا تھا؟ اس پر صدر بائیڈن نے کہا کہ وہ سنتے رہے، انہوں نے اس پرب حث نہیں کی، اگر آپ غور کریں تو اس کے بعد چین روس کے زیادہ حق میں نہیں گیا۔

صدر بائیڈن نے کہا کہ میرا خیال ہے کہ اس بات کا امکان موجود ہے کہ ہم مل کر کام کر سکتے ہیں۔