تربت: افغان مصنوعات کی پیکنگ میں ڈھائی ٹن منشیات پکڑی گئی

اینٹی نارکوٹکس فورس نے تربت(بلوچستان)میں چھاپہ مار کارروائی کے دوران گھر میں موجود ڈھائی ٹن سے زائد منشیات قبضے میں لے لی۔

ترجمان اے این ایف کے مطابق بین الاقوامی سطح پر منشیات اسمگلنگ کی بڑی کوشش ناکام بنا دی گئی، تربت کے علاقے باشولی میں گرینڈ انٹیلیجنس بیسڈ آپریشن کے دوران بھاری مقدار میں منشیات برآمد کی گئی۔

چھاپہ مار کارروائی کے دوران گھر میں موجود ڈھائی ٹن سے زائد منشیات پکڑی گئی،منشیات میں 2080 کلوگرام چرس، 290 کلوگرام ہیروئن اور 195 کلوگرام آئس شامل ہے،منشیات کے پیکٹوں پر افغانی مصنوعات کی آرائشی تحریر نمایاں ہے۔

برآمدشدہ منشیات سمندری رستے سے، بیرون ملک اسمگل کی جانی تھی، منشیات قبضے میں لے کر ملوث ملزمان کیخلاف مزید تحقیقات کا آغاز کر دیا گیا ہے۔