سیالکوٹ ایئرپورٹ پر مسافر کے ٹرالی بیگ سے ڈھائی کلوآئس برآمد

اینٹی نارکوٹکس فورس نے بلوچستان سمیت ملک کے دیگرشہروں میں کارروائیوں کے دوران بھاری مقدار میں منشیات برآمد کرکے ملزمان کوگرفتارکرلیا۔

ترجمان اے این ایف کے مطابق منشیات اسمگلنگ کے خلاف کریک ڈاون کا سلسلہ جاری ہے،گوادر کے علاقے مزانی کے قریب چھپائی گئی24کلوگرام چرس برآمد کی گئی جبکہ چاغی کےعلاقے گردی کے جنگل میں چھپائی گئی 15کلوگرام چرس تحویل میں لی گئی۔

موٹروے ٹول پلازہ اسلام آباد کے قریب مسافر بس میں سوار 3 ملزموں کے پیٹ سے مجموعی طورپر19ہیروئن سے بھرکیپسول برآمد کیے گئے۔

جہلم میں واقع ڈائیوو کارگو آفس پرکارروائی کے دوران پارسل سے 600گرام آئس برآمد کی گئی،2واٹرکولرز میں چھپائی گئی آئس پشاورسے اسمگل کی گئی تھی۔

سیالکوٹ ائیرپورٹ پر مسافر کے ٹرالی بیگ سے 2 کلو 594 گرام آئس برآمد کی گئی،ملزم پرواز نمبرجی ایف 769کے ذریعے بحرین کے لیے روانہ ہورہا تھا، قصورمیں پنجاب رینجرز کے ساتھ مشترکہ کارروائی میں 5ملزمان کو گرفتارکیاگیا، گرفتار ملزمان کے قبضے سے 7 کلو 100 گرام ہیروئن برآمد ہوئی،کارروائی میں ملزمان کی موٹرسائیکلیں بھی تحویل میں لی گئیں۔

باجوڑ کے علاقے میں اسمگلنگ کے لئے چھپائی گئی 10 کلوگرام چرس جبکہ خیبرکے علاقے سپینہ مورگہ بارڈر کے قریب کارروائی میں 10کلوگرام چرس قبضے میں لی گئی، گرفتار ملزمان کے خلاف انسدادِ منشیات ایکٹ کے تحت مقدمات درج کر کے مزید تحقیقات کا آغازکردیا گیا ہے۔