یو ایس ایڈ سندھ کے شعبہ تعلیم میں کچھ نئے منصوبے شامل کرے، وزیراعلیٰ سندھ کی درخواست

وزیراعلیٰ سندھ سے امریکا کے قونصل جنرل مسٹر کونراڈ ٹریبل نے ملاقات کی، مراد علی شاہ نے یوایس ایڈ سندھ میں شعبہ تعلیم میں کچھ نئے منصوبے لانے کی درخواست کی۔

ملاقات میں یو ایس ایڈ مشن ڈائریکٹر کیٹ سومونگسیری، چیئرمین پی اینڈ ڈی نجم شاہ، وزیراعلیٰ کے سیکریٹری  رحیم شیخ بھی شریک تھے۔

ترجمان وزیراعلیٰ ہاوس کےمطابق وزیراعلیٰ سندھ  سید مراد علی شاہ نے امریکی قونصل جنرل سے کہا کہ یو ایس ایڈ سندھ میں شعبہ تعلیم میں کچھ نئے منصوبے لائے،سیلاب کے باعث بڑی تعداد میں اسکول عمارتیں متاثر ہوئی ہیں،چاہتے ہیں کہ یو ایس ایڈ اسکول کی عمارتوں کی تعمیر میں تعاون کرے،سیلاب نے سندھ میں 21 لاکھ گھر متاثر ہوئے ہیں۔

اس موقع پر  وزیراعلیٰ سندھ  نے کہا کہ پانچ ہزار گھروں کی تعمیر کیلئے فنڈز جاری ہوچکے ہیں جبکہ ایک ہزار گھروں کی تعمیر مکمل ہوچکی ہے،حکومت نے محکمہ سوشل پروٹیکشن  قائم کیا ہے،غذائی قلت کے منصوبے پر کام محکمہ سماجی بہبود نے شروع کردیا ہے۔

اجلاس میں یو ایس ایڈ پاکستان کی سربراہ نے وزیراعلیٰ کے شعبہ تعلیم میں دلچسپی کو سراہا اور کہا کہ مدر چائلڈ نیوٹریشن پر سندھ میں کام کرنا چاہتے ہیں۔

مریکی قونصل جنرل نے کہا کہ گوگل کراچی میں ٹریفک مینجمنٹ پروگرام شروع کرنا چاہتی ہے،جس پر وزیراعلیٰ سندھ نے کہاکہ سندھ حکومت گوگل سے بھرپور تعاون کرے گی۔

اجلاس میں طے ہوا کہ یو ایس ایڈ اور محکمہ پی اینڈ ڈی  کا الگ اجلاس ہوگا۔