غریدہ فاروقی کی درخواست پر وی لاگر عمر عادل گرفتار

خاتون اینکر کی طرف سے سوشل میڈیا پر ساکھ کو نقصان پہنچانے کے الزام پر وی لاگر عمر عادل کو گرفتار کر لیا گیا،لاہور میں ایف آئی اے سائبر کرائم ونگ نے خاتون اینکر کی درخواست پر مقدمہ درج کر کے وی لاگر کو گرفتار کیا۔

ٹی وی اینکر غریدہ فاروقی نے ایف آئی اے سائبر کرائم ونگ کو دی گئی درخواست میں کہا کہ وی لاگر ڈاکٹر عمر عادل نے سوشل میڈیا پر اُن کے خلاف تضحیک آمیز گفتگو کی، غلیظ زبان کے ساتھ اُ ن کی ساکھ اور شائستگی کو دھچکا لگا۔

غریدہ فاروقی کا کہنا ہے کہ عمر عادل کی ویڈیو سوشل میڈیا پر وائرل ہونے سے اُن کے وقار کو بھی نقصان پہنچا ،عمر عادل نے میری نجی زندگی میں دراندازی کر کے میری ساکھ کو شدید نقصان پہنچایا۔

خاتون ٹی وی اینکر کی درخواست پر سائبر کرائم ونگ نے انکوائری کے لیے آنے والے ڈاکٹر عمرعادل کو گرفتار کر کے معاملے کی مزید تحقیقات شروع کر دیں۔

عمر عادل نے اینکر غریدہ فاروقی سمیت کئی خواتین پر فحش اور جھوٹے الزامات عائد کیے تھے۔

ایف آئی اے حکام کا کہنا ہے کہ سائبر کرائم ونگ کی عمر عادل سے تفتیش جاری ہے۔

واضح رہے کہ وزیر اطلاعات پنجاب عظمیٰ بخاری نے بھی یوٹیوبر عمر عادل کے خلاف ایف آئی اے میں درخواست دی تھی۔