کرپشن اور نا اہلی پر ایف بی آر کے 4 ممبرز سمیت 12 افسروں کو عہدوں سے ہٹا دیا گیا

وزیراعظم شہباز شریف کی ہدایت پر ایف بی آر کے کرپٹ اور نااہل افسران کے گرد گھیرا تنگ کردیا گیا،چار ممبرز سمیت بارہ سنئیر افسروں کو عہدوں سے فارغ کردیا گیا۔

وزیراعظم کی ہدایت پرمکمل جانچ کے بعدان لینڈ ریونیو سروس اورکسٹمز کے 12 افسروں کواوایس ڈی بنا دیا گیا۔وزیراعظم نے کرپٹ اور نااہل افسران کے خلاف کارروائی کی ہدایت کی اور کرپشن میں ملوث افسران کو ملازمت سے برخاست کرنے کے احکامات بھی دئیے ہیں۔

ایف بی آرکے بارہ اعلیٰ افسروں کو عہدوں سے ہٹانے کا نوٹیفکیشن جاری کردیا گیا۔ نوٹیفکیشن کے مطابق گریڈ اکیس اور بائیس کے بارہ افسران عہدوں سے فارغ کردیے گئے اور ان کی خدمات ایف بی آر ایڈمن پول کے سپرد کردی گئیں۔

نوٹیفکیشن میں کہا گیا ہے کہ چار ممبرز، چار ڈی جیز، تین چیف کمشنرز اور ایک چیف کلیکٹر کو او ایس ڈی بنادیا گیا ہے۔

جن چار ممبرز کو او ایس ڈی بنایا گیا ہے ان میں  ممبرکسٹمز اکاؤنٹنگ مکرم جاہ انصاری، ممبر آئی آر پالیسی آفاق قریشی ، ممبر اکاؤنٹنگ طارق مصطفیٰ، ممبر کسٹمز آپریشن ڈاکٹر فرید اقبال قریشی شامل ہیں۔

ایف بی آر نوٹیفکیشن میں بتایاگیا ہے چیف کلیکٹر چیف کلیکٹریٹ اپریزمنٹ کسٹمز ہاؤس محمد سلیم،  ڈی جی آئی او سی او شاہ بانو خان، ڈی جی لا اینڈ انفورسمنٹ اسلام اباد احمد رؤف کو بھی او ایس ڈی بنا دیا گیا ہے۔