زرداری، شاہد خاقان،حسین لوائی، اومنی گروپ سمیت 22 مقدمات نیب سے دیگر فورمز کو منتقل ہوئے، سپریم کورٹ میں رپورٹ جمع

قومی احتساب بیورو کی جانب سے سپریم کورٹ میں جمع کروائی گئی تفصیلات کے مطابق نیب ترامیم کے تحت رواں برس 30 اگست تک 12 ریفرنسز نیب عدالتوں سے منتقل ہوئے جن میں سابق صدر آصف علی زرداری اور سابق وزیراعظم شاہد خاقان عباسی کے کیسز بھی شامل ہیں۔

یاد رہے کہ نیب ترامیم کے خلاف کیس سپریم کورٹ میں زیرسماعت ہے۔ ان ترامیم کے خلاف درخواست چیئرمین پی ٹی آئی عمران خان نے دائر کی تھی۔

سپریم کورٹ میں جمع کروائی گئی تفصیلات کے مطابق سابق صدر آصف علی زرداری کے خلاف پارک لین ریفرنس جبکہ شاہد خاقان عباسی کے خلاف ایل این جی ریفرنس نیب عدالتوں سے واپس ہوئے۔

انھی ترامیم کے تحت خورشید انور جمالی، منظور قادر کاکا، خواجہ انور مجید، جعلی اکاؤنٹس کیس کے مرکزی ملزم حسین لوائی، اومنی گروپ کے عبدالغنی مجید اور دیگر افراد کے خلاف مجموعی طور پر 22 مقدمات احتساب عدالتوں سے واپس ہو کر دیگر متعلقہ فورمز کو بھیجے گئے۔