کراچی کے علاقے پیر آباد میں گھر سے 50 لاکھ روپے اور طلائی زیورات چوری

کراچی میں چوری کی بڑی واردات، ملزمان پچاس لاکھ روپے نقدی اور پانچ تولہ سونا لے اڑے۔

واردات پیر آباد کے علاقے فقیر کالونی میں ہوئی، مدعی کے مطابق وہ پلاسٹک کمپنی میں سیلز مین اور ریکوری کا کام کرتا ہے، چوری شدہ رقم کمپنی کی تھی۔

عید کی تعطیلات کے باعث رقم گھر لاکر رکھی تھی جو چھٹیاں ختم ہونے پر کمپنی میں جمع کرانی تھی۔

مدعی کا کہنا ہے کہ وہ شام سات بجے اہل خانہ کے ہمراہ گھر سے نکلا اور رات تقریبا ایک بجے واپس آیا تو گھر کے دروازے کھلے اور سامان بکھرا پڑا تھا، جبکہ گھر میں موجود پچاس لاکھ پینتالیس ہزار کی رقم اور پانچ تولہ طلائی زیورات غائب تھے۔

اس نے واقعہ کی فوری اطلاع مدد گار ون فائیو کو دی اور مالک مکان کو بھی آگاہ کیا، پولیس نے واردات کا مقدمہ درج کرکے تفتیش شروع کردی ہے۔