ایس ای سی پی میں رجسٹرڈ صرف 50 فیصد کمپنیاں سالانہ ٹیکس ریٹرن جمع کراتی ہیں، رپورٹ میں انکشاف

سیکیورٹیز اینڈ ایکسچینج کمیشن آف پاکستان میں رجسٹرڈ 100,000 اداروں میں سے کل 50,000 کمپنیاں اپنے سالانہ انکم ٹیکس گوشوارے جمع کروا رہی ہیں۔

اعداد و شمار کا انکشاف ایف بی آر کی رپورٹ (اسٹیک ہولڈر انگیجمنٹ پلان) میں کیا گیا ہے جو ورلڈ بینک کی مالی اعانت سے پاکستان ریزز ریونیو پروجیکٹ کے تحت جاری کی گئی ہے۔

اصلاحات پر ایف بی آر کی رپورٹ میں انکشاف کیا گیا ہے کہ ایس ای سی پی اور ایف بی آر ورچوئل ون اسٹاپ شاپ کے تحت کمپنی اور نیشنل ٹیکس نمبر رجسٹریشن کے لیے ون ونڈو سہولت کے ذریعے ڈیٹا شیئر کرتے ہیں۔ یہ اسکیم کاروبار کرنے میں آسانی کے ایجنڈے کے تحت کمپنیوں کے رجسٹریشن کے عمل کو آسان بنانے کے لیے شروع کی گئی ہے۔

اگرچہ ضرورت پر مبنی ڈیٹا کے اشتراک کے لیے دونوں اداروں کے درمیان مفاہمت کی یادداشت (ایم او یو) موجود ہے، تاہم نمائندوں نے محسوس کیا کہ ایف بی آر کو ڈیٹا اور معلومات کے اشتراک کے لیے زیادہ فعال ہونا چاہیے۔

سیکیورٹیز اینڈ ایکسچینج کمیشن آف پاکستان میں رجسٹرڈ 100,000 کمپنیوں میں سے صرف 50,000 اپنے ٹیکس جمع کر رہی ہیں اور اس مسئلے کو ایس ای سی پی اورایف بی آر کو مشترکہ طور پر حل کرنے کی ضرورت ہے۔

ایس ای سی پی کے پاس مختلف قسم کی کمپنیوں (محدود ذمہ داری، واحد ملکیت، گروپ کمپنیاں، وغیرہ) کے لیے ٹیکس کے نظام کے بارے میں مختلف آئیڈیاز ہیں جو بہتر ٹیکسیشن کے لیے ایک سازگار ماحول قائم کرنے میں مدد کر سکتے ہیں۔ ایف بی آر کی رپورٹ میں کہا گیا ہے کہ ایس ای سی پی اور ایف بی آر کے درمیان تعلقات اور بہتر رابطہ کاری مختلف قسم کی کمپنیوں کے لیے ٹیکس کے فوائد قائم کرنے میں مدد دے سکتی ہے، انہیں ایف بی آر کے ساتھ رجسٹر کرنے اور اس طرح کے فوائد سے فائدہ اٹھانے کی ترغیب دے سکتی ہے۔