پی آئی اے کی نجکاری کے لیے 6 کمپنیوں/ کنسورشیمز نے پری کوالیفائی کر لیا

نجکاری کمیشن کے بورڈ نے پی آئی اے کی نجکاری کیلئے چھ کمپنیوں کو ابتدائی طور پر اہل قرار دے دیا ہے، جس کے بعد یہ کمپنیاں پی آئی اے کی نجکاری میں حصہ لے سکتی ہیں۔

وفاقی وزیر نجکاری عبدالعلیم خان کی زیر صدارت نجکاری کمیشن کے بورڈ کا اجلاس ہوا، اجلاس میں پی آئی اے کی نجکاری کے سلسلے میں 6 کمپنیوں /کنسورشیمز نے پری کوالیفائی کا مرحلہ کامیابی کے ساتھ مکمل کرلیا۔

جن کمپنیوں نے پری کوالیفائی کیا ان میں ائیر بلو، عارف حبیب کارپوریشن، بلیو ورلڈ سٹی، فلائی جناح، پاک ایتھنول کنسورشیم اور وائی بی ہولڈنگز کنسورشیم شامل ہیں، پری کوالیفائیڈ کمپنیاں /کنسورشیمز پی آئی اے کی بولی میں حصہ لے سکیں گی۔

اس موقع پر خطاب کرتے ہوئے وزیر نجکاری عبدالعلیم خان نے کہا کہ خسارے میں چلنے والے تمام اداروں کی شفاف اور تیزنجکاری یقینی بنائیں گے۔ انہوں نے نجکاری کمیشن کے حکام سے کہا کہ نجکاری میں حصہ لینے والے اداروں کے تکنیکی و مالیاتی استحکام کومدنظر رکھیں۔

ان کا کہنا تھا کہ معاشی مستحکم کے لئے نقصان کرنے والے اداروں کی نجکاری کر رہے ہیں، کاروباری گروپس کی ساکھ کا خیال رکھتے ہوئے ان کی حوصلہ افزائی کریں گے، نجکاری کا عمل میڈیا پر لائیو دکھایا جائے گا۔