بھارتی وزیراعظم مودی کے خلاف تحریک عدم اعتماد کا نوٹس جمع

بھارت میں اپوزیشن اتحاد ’ انڈیا‘ نے وزیراعظم مودی کے خلاف تحریک عدم اعتماد جمع کرادی، لوک سبھا کے سپیکر اوم برلا نے اپوزیشن کا تحریک عدم اعتماد کا نوٹس وصول کر لیا۔

کانگریس کے آسام سے رکن لوک سبھا گورو گگوئی نے تحریک عدم اعتماد کا نوٹس جمع کرایا، اس تحریک کا مقصد وزیراعظم مودی کو منی پور فسادات سمیت کئی ایک ایشوز پر جواب کے لیے مجبور کرنا ہے۔

سپیکر اوم برلا نے کہا کہ وہ قواعد کے مطابق اس معاملے پر تمام جماعتوں سے بات کریں گے،اور اس تحریک پر بحث کے لیے شیڈول سے آگاہ کریں گے۔

قواعد کے مطابق کوئی بھی تحریک عدم اعتماد کا نوٹس صبح دس بجے سے پہلے جمع کرایا جائے تو اسی دن اس پر بات ہونی چاہئے، یہ نوٹس صبح 9 بج کر 20 منٹ پر جمع کرایا گیا۔

باخبر ذرائع نے بتایا کہ لوک سبھا میں اس نوٹس پر آج بات ہونا ناممکن نظر آتا ہے، یہ نوٹس لوک سبھا میں شور شرابے کے بعد جواب کرایا گیا کیونکہ اپوزیشن منی پور فسادات پر مودی سے بات کرنے کا مطالبہ کر رہی ہے اور حکمران بی جے پی اس سے انکاری ہے۔

وزیر داخلہ امت شا نے پارلیمنٹ کے دونوں ایوانوں میں حزب اختلاف کے لیڈروں کو منگل کے روز خط لکھ کر منی پور فسادات پر بحث کی پیشکش کر کے کشیدگی کم کرنے کی کوشش کی تھی۔

مودی حکومت کو لوک سبھا میں 332 ارکان کی حمایت حاصل ہے اور عدم اعتماد کی تحریک فوری خطرہ نہیں ہے۔

مودی کے خلاف 20 جولائی 2018 کو بھی عدم اعتماد کی تحریک پیش ہوئی تھی لیکن ناکام رہی۔