پاکستان کے اندر حملے روکنا ہماری ذمہ داری نہیں، سکیورٹی ادارے اپنا کام کریں، ترجمان افغان طالبان

افغان طالبان کی حکومت کے ترجمان نے پاکستان کے اندر دہشتگردی کے واقعات سے متعلق پاکستان کے وزیئر دفاع، وزیر خارجہ اور آرمی چیف کے بیانات کو مسترد کرتے ہوئے کہا ہے کہ پاکستان کی سکیورٹی ایجنسیاں اپنا کام درست طریقے سے انجام دیں، خطے میں مدارس اور علما پر حملوں کی سازش کی پیشگی اطلاع دی تھی، پاکستان کے اندر حملوں کی روک تھام ہمارا کام نہیں۔

افغان طالبان کی حکومت کے ترجمان ذبیح اللہ مجاہد نے ایک بیان میں کہا کہ پاکستان میں سیکیورٹی کے حالیہ افسوسناک واقعات کے بعد پاکستانی حکام نے ایک بار پھر اپنے ملک کی سیکیورٹی کو مضبوط کرنے کے بجائے افغانوں پر الزام لگایا ہے۔

ذبیح اللہ مجاہد نے کہا کہ امارت اسلامیہ افغانستان ان الزامات کو یکسر مسترد کرتی ہے اور پاکستانی حکام کو یاد دلاتی ہے کہ افغانستان ایک ایسا ملک ہے جو طویل جنگوں سے نکلا ہے اور کسی دوسرے ملک خصوصاً پڑوسی ممالک میں عدم تحفظ نہیں چاہتا۔

افغان طالبان کے ترجمان کا مزید کہنا ہے کہ افغانستان کی حکومت ایک بار پھر اپنے اخلاقی موقف کا اعادہ کرتی ہے کہ وہ افغانستان کی سرزمین کو کسی دوسرے ملک کی سلامتی کے خلاف استعمال کرنے کی اجازت نہیں دیتی لیکن اس کا یہ مطلب نہیں کہ خطے میں کسی بھی ملک کی سلامتی کی ناکامی کا ذمہ دار افغانستان ہے۔

ذبیح اللہ مجاہد نے کہا کہ بدقسمتی سے ہمارا خطہ گزشتہ بیس سال میں امریکہ کی قیادت میں بیرونی جارحیت اور خطے کے بعض ممالک کی غلط پالیسیوں کا شکار رہا جس کے اثرات آج بھی محسوس کیے جا رہے ہیں۔پاکستان کو اپنی سلامتی کی صورتحال کو احتیاط سے سنبھالنا چاہیے اور اپنے گھر میں ہی اس کا حل تلاش کرنا چاہیے۔

افغان طالبان حکومت کے ترجمان نے دعویٰ کیا کہ گزشتہ سال 1444 ہجری (2022) میں افغانستان میں مختلف کارروائیوں میں داعش کے 18 پاکستانی ارکان مارے گئے جو ہماری سرزمین میں دھماکے اور حملے کر رہے تھے اور دسیوں دیگر کو زندہ پکڑ لیا گیا۔ تمام دستاویزات اور شواہد ہمارے پاس موجود ہیں۔افغان حکومت نے پاکستان پر الزام تراشی کی انگلی اٹھانے کے بجائے اپنے حفاظتی اقدامات کو مزید مضبوط کیا جس کے نتائج الحمدللہ سامنے آئے۔

ذبیح اللہ مجاہد نے کہا کہ یہ بات قابل ذکر ہے کہ اگر کوئی پاکستان میں حملہ کرتا ہے یا داعش کے نام پر افغانستان اور پاکستان کے مسلمانوں کا خون بہاتا ہے تو اس کا حل مل کر تلاش کرنا چاہیے، الزام لگانا اس کا حل نہیں ہے۔چونکہ افغانستان اور خطے میں علمائے کرام اور مدارس پر حملوں کی ایک بڑی سازش جاری ہے، ہماری انٹیلی جنس ایجنسیوں کو اس بارے میں پیشگی اطلاع مل گئی اور انہوں نے افغانستان میں اس کی روک تھام کے لیے موثر کارروائیاں کیں اور خطے کے ممالک کے ساتھ معلومات بھی شیئر کیں۔ یہ مسئلہ ہے، لیکن بدقسمتی سے، کچھ ممالک نے بروقت اقدامات نہیں کیے۔

افغان طالبان کی حکومت کے ترجمان نے کہا کہ امارت اسلامیہ افغانستان ایک بار پھر یقین دہانی کے ساتھ کہتی ہے کہ ہم پاکستان میں کسی حملے کے حق میں نہیں ہیں اور نہ ہی ہم کسی کو افغانستان کی سرزمین پاکستان کے خلاف استعمال کرنے کی اجازت دیتے ہیں لیکن پاکستان کی سرزمین کے اندر حملوں کی روک تھام اور کنٹرول ہمارا کام نہیں ہے۔ بلکہ یہ اس ملک کی سیکیورٹی اور انٹیلی جنس ایجنسیوں کا فرض ہے جس کے لیے وہ اپنے ملک کے بجٹ کا بڑا حصہ خرچ کرتے ہیں۔ پاکستانی سیکیورٹی اداروں کو اپنا کام صحیح طریقے سے کرنا چاہیے اور افغانستان پر پاکستانی عوام اور عالمی برادری کی ذہنیت کو بدلنے کے لیے الزام نہیں لگانا چاہیے۔

ذبیح اللہ مجاہد نے کہا کہ گزشتہ 2 سالوں میں جب سے افغانستان میں ایک آزاد اور ذمہ دار حکومت قائم ہوئی ہے، افغانستان اور خطے میں سیکیورٹی کی صورتحال میں نمایاں بہتری آئی ہے۔حقیقت یہ ہے کہ سیکیورٹی کے واقعات صرف پاکستان میں بڑھے ہیں، پاکستان کو اپنے ملک میں ہی اس کا حل تلاش کرنے کی ضرورت ہے۔