سندھ پولیس نے قومی کرکٹرز کو بھی دھمکا کر رشوت وصول کر لی

پاکستانی کرکٹر صہیب مقصود اور عامر یامین نے سندھ پولیس پر رشوت لینے کا الزام عائد کیا ہے۔

صہیب مقصود نے سوشل میڈیا پر لکھا ہے کہ ہم بہت خوش قسمت ہیں کہ ہم سندھ میں نہیں پنجاب میں رہتے ہیں، زندگی میں پہلی بار کراچی سے ملتان بذریعہ روڈ سفر کیا۔

انہوں نے لکھا کہ سندھ پولیس اتنی کرپٹ ہے کہ 50 کلومیٹر کے بعد آپ کو روک کر پیسے مانگتی ہے اور نہ دینے کی صورت میں تھانے لے جانے کی دھمکی دیتی ہے۔

صہیب مقصود نے لکھا کہ سندھ پولیس میں کرپشن عروج پر ہے، ہم نے پولیس کو بتایا کہ ہم کرکٹرز ہیں اور کراچی میں میچ کھیلنے کے بعد واپس ملتان جارہے ہیں پھر بھی انہوں نے ہم سے 8 ہزار روپے لے لیے۔

We are so lucky that we live In Punjab not in Sindh first time in my life I am travelling from Karachi to Multan by Road and sindh police is so corrupt that they stop you after 50 km and ask for money or they threat you to go to the police station for no reason if you give them

— Sohaib Maqsood (@sohaibcricketer) November 27, 2023

اس واقعے سے متعلق سوشل میڈیا پر کرکٹر عامر یامین نے بھی تصدیق کی ہے۔رپورٹس کے مطابق عامر یامین اور صہیب مقصود کو سکرنڈ پولیس اسٹیشن کی حدود میں روکا گیا تھا۔

دوسری جانب آئی جی سندھ رفعت راجہ نے کرکٹر عامر یامین کے ٹوئٹ پر نوٹس لے لیا ہے۔ترجمان کے مطابق ڈی آئی جی شہید بے نظیر آباد کو فوری تحقیقات کا حکم دے دیا گیا ہے۔

آئی جی سندھ نے کہا ہے کہ واقعے میں ملوث اہلکاروں کے خلاف سخت کارروائی کی جائے۔

واضح رہے کہ نیشنل ٹی 20 کپ میں صہیب مقصود اور عامر یامین ملتان ریجن کی نمائندگی کر رہے تھے۔