راولپنڈی : مغل سرائے مارکیٹ میں آتشزدگی سے 12 دکانیں مکمل جل گئیں، متعدد کو جزوی نقصان

راولپنڈی کی مغل سرائے مارکیٹ میں آتشزدگی کے باعث ریڈی میڈ گارمنٹس،آرٹیفیشل جیولری اور گھڑیوں کی بارہ سے زائد دوکانیں مکمل جل گئیں جبکہ متعدد کو جزوی نقصان پہنچا۔

ترجمان ریسکیو کے مطابق ممکنہ طور پر گراونڈ فلور پرشارٹ سرکٹ کے باعث اگ تیزی سے پھیلی اورفرسٹ اورسیکنڈ فلور کو بھی اپنی لپیٹ میں لے لیا۔

مارکیٹ کے چوکیدارکے نہ ہونے کے باعث واقعے کی اطلاع تاخیر سے ہو سکی تاہم ریسکیو فائر بریگیڈ  موقع پر پہنچ گئی، تنگ گلیوں اور بجلی تاروں کے گچھوں کے باعث آگ بجھانے میں مشکلات کو دیکھتے ہوئے جی ایچ کیو فائر بریگیڈکے فائر ٹینڈر بھی طلب کئے گئے۔

سات گھنٹے بعد مغل سرائے مارکیٹ میں لگی آگ پر قابوپانے پایا گیا تاہم علی الصبح لگنے والی آگ اور مارکیٹ بند ہونے کے باعث کوئی جانی نقصان نہیں ہوا۔

تاجروں کے مطابق  آتشزدگی کے سے لاکھوں روپے مالیتی ریڈیمیڈ گار منٹس ودیگر سامان جل کر خاکسترہوگیا، آگ پھیلنے کے ساتھ ہی ملحقہ دکانداروں کی جانب سے دکانوں سے سامان نکالنا شروع کردیا تاہم امدادی ٹیموں کی کوششوں سے صورتحال پر قابو پالیا گیا۔