مراد علی شاہ کی ہیٹرک، دو تہائی اکثریت سے وزیراعلیٰ سندھ منتخب

سندھ اسمبلی میں وزیراعلی سندھ کا انتخاب کا مرحلہ مکمل ہوگیا، سید مراد علی شاہ وزیر اعلی سندھ تاریخ میں پہلی بار دو تہائی اکثریت سے وزیراعلی منتخب ہوگئے، مراد علی شاہ مسلسل تیسری بار وزیراعلیٰ منتخب ہوئے ہیں۔

سندھ کے وزیرِ اعلیٰ کے انتخاب کے سلسلے میں سندھ اسمبلی کا اجلاس اسپیکر اویس قادر شاہ کی زیرِ صدارت آدھے گھنٹے کی تاخیر سے شروع ہوا، اجلاس کا آغاز تلاوت قرآن پاک سے ہوا۔

وزیر اعلی کا انتخاب اوپن بیلٹ کے ذریعے ہوا، وزیر اعلی سندھ کے لیے پیپلز پارٹی کے مراد علی شاہ اور ایم کیو ایم کے علی خورشیدی آمنے سامنے تھے۔سندھ اسمبلی کے ایوان میں موجود ارکان کی تعداد 158 ہے۔

مراد علی شاہ کو 112 ووٹ ملے، انکے مد مقابل ایم کیو ایم کے علی خورشیدی نے 36 ووٹ حاصل کیے، 9 آزاد اراکین اور جماعت اسلامی کے اسمبلی میں موجود واحد رکن نے ووٹنگ میں حصہ نہیں لیا، ووٹنگ کے لیے ڈویژن کا طریقہ کار اختیار کیا گیا۔

مراد علی شاہ صوبے کے 25 ویں وزیراعلیٰ ہیں، مراد علی شاہ مسلسل تیسری بار وزیر اعلی سندھ منتخب ہوئے ہیں۔

وزیر اعلیٰ سندھ کی تقریب حلف برداری کل شام ہو گی، مراد علی شاہ وزیر اعلیٰ سندھ کی حیثیت سے حلف اٹھائیں گے، حلف برداری کی تقریب گورنر ہاؤس میں شام 5 بجے ہوگی۔