وزیراعلیٰ پنجاب کی اپوزیشن بنچوں پر جا کر رانا آفتاب سے ملاقات

وزیراعلیٰ پنجاب مریم نواز بے اپوزیشن کے ساتھ ورکنگ ریلیشن بہتر بنانے کے لیے پہل کردی، پنجاب اسمبلی اجلاس کے دوران سنی اتحاد کونسل کے بنچز پر گئیں اور پارلیمانی لیڈر رانا آفتاب احمد خان سے ملاقات کی۔

مریم نواز شریف نے رانا آفتاب احمد خان کے لئے خیر سگالی کے جذبے کا اظہار کیا اور کہا کہ انتخاب کے دن آپ سے میری ملاقات نہ ہوسکی، اس دن بھی چاہتی تھی کہ آپ ایوان میں ہوتے، یہی کہنے آئی ہوں کہ آپ سب کے لئے میرے دروازے کھلے ہیں، جتنی حکومتی ارکان کی وزیر اعلیٰ ہوں، اتنی ہی آپ کی بھی ہوں۔

رانا آفتاب احمد خان نے وزیر اعلیٰ پنجاب مریم نواز شریف کا شکریہ ادا کیا اور کہا کہ اس دن کوئی جگہ بتا دی جاتی تو ہم آ جاتے۔

مریم نواز نے کہا کہ میں نے اس دن لوگوں کو آپ کے پیچھے بھیجا، میں نے پوری کوشش کی کہ آپ اس عمل میں شریک ہوں۔