لاہور ہائیکورٹ کے ایک اور جج کو مشکوک خط موصول، خطوط میں سنکھیا پایا گیا، تفتیشی ذرائع

لاہورہائیکورٹ کے جسٹس علی باقرنجفی کو بھی مشکوک خط موصول ہوا ہے،ذرائع کا کہنا ہے کہ لاہور ہائیکورٹ کے ججز کو ملنےوالے خطوط کی تعداد 6 ہوگئی۔

ذرائع نے بتایا کہ جسٹس علی باقر نجفی کو اسلام آباد ہائیکورٹ کے ججز کی طرح کا خط موصول ہوا،جسٹس علی باقر نجفی کے اسٹاف نے مشکوک خط موصول کیا،مشکوک خط سی ٹی ڈی کے حوالےکردیا گیا۔

دریں اثنا سپریم کورٹ اور ہائیکورٹ کے ججز کو بھجوائے گئے خطوط کی تفتیش میں بڑی پیش رفت ہوئی ہے۔

خطوط سے ملنے والے پاوڈر میں آرسینک کی موجودگی کا انکشاف ہوا ہے۔

ذرائع کے مطابق خطوط میں موجود پاوڈور میں آرسینک کی مقدار دس فیصد تک ہو سکتی ہے۔

آرسینک ایک زہریلا مواد ہوتا ہے،پاوڈر میں آرسینک کی ستر فیصد سے زائد مقدار بہت زہریلی ہوتی ہے، اس کے سونگنے سے انسان کے اعصاب پر شدید اثر پڑتا ہے۔

خطوط سے ملنے والے پاؤڈر کے نمونے کو فرانزک لیب پنجاب بھیجا گیا تھا۔