کے 2 سر کرنے کی کوشش کرنے والے 2 جاپانی کوہ پیما لاپتہ ہو گئے

پاکستان میں دو جاپانی کوہ پیما دنیا کی دوسری بلند ترین چوٹی کے ٹو کو سر کرنے کی کوشش کے دوران لاپتہ ہوگئے ہیں۔

دونوں کوہ پیما الپائن سٹائل سے کوہ پیمائی کر رہے تھے، جس میں نصب شدہ رسیوں کی مدد کم سے کم لی جاتی ہے اور کوہ پیما انتہائی برق رفتاری سے چوٹی سر کرنے کی کوشش کرتے ہیں۔

ماہرین الپائن سٹائل کو انتہائی خطرناک اور مشکل قرار دیتے ہیں۔

شگر کے ڈپٹی کمشنر ولی اللہ فلاحی کے مطابق جاپانی کوہ پیما کینرو ناکاجیما اور کزویا ہرائڈے دو روز قبل لاپتہ ہوئے تھے اور دونوں کی تلاش کے لیے ریسکیو آپریشن شروع کردیا گیا ہے۔

ڈپٹی کمشنر کے مطابق دونوں کوہ پیماؤں کی تلاش کے لیے گذشتہ روز ہیلی کاپٹر کا استعمال کیا گیا تھا، جبکہ ابھی بھی زمینی آپریشن جاری ہے۔

الپائن کلب آف پاکستان کے سیکریٹری کرار حیدری کے مطابق دونوں کوہ پیما اپنی مہم کے دوران تقریباً سات ہزار میٹر کی بلندی پر لاپتہ ہوئے ہیں۔

انھوں نے مزید کہا کہ لاپتہ جاپانی کوہ پیما نہ صرف الپائن سٹائل کے ذریعے کے ٹو سر کرنے کی کوشش کر رہے تھے بلکہ ان کا ارادہ تھا کہ کے ٹو کے مغربی حصے میں ایک نئے روٹ کے ذریعے یہ مہم مکمل کی جائے۔

واضح رہے رواں برس اس سے قبل چار جاپانی باشندے کوہ پیمائی کے دوران ہلاک ہوچکے ہیں۔