غزہ جنگ کے خلاف اسرائیلی سفارتخانے کے سامنے خودسوزی کرنے والا امریکی فوجی دم توڑ گیا

واشنگٹن میں اسرائیلی سفارت خانے کے باہر غزہ جنگ کے خلاف احتجاج کے طور پر خودسوزی کرنے والا امریکی فوجی دم توڑ گیا۔

میٹروپولیٹن پولیس ڈیپارٹمنٹ کے ترجمان لی لیپ نے امریکی فضائیہ کے اہلکار کی موت کی تصدیق کی۔ این بی سی نیوز نے ایک نامعلوم امریکی اہلکار کا حوالہ دیتے ہوئے کہا کہ فوج کی جانب سے ان کے خاندان کو مطلع کرنے کے بعد مزید تفصیلات جاری کی جائیں گی۔

ڈی سی فائر اورای ایم ایس نے پہلے کہا تھا کہ یو ایس سیکرٹ سروس کے افسران کی جانب سے آگ بجھانے کے بعد اتوار کو امریکی ایئر مین کو تشویشناک حالت میں اسپتال میں داخل کرایا گیا تھا۔

نیویارک ٹائمز نے اطلاع دی تھی کہ فوجی لباس پہنے ہوئے اس شخص نے اس واقعے کو انٹرنیٹ پر براہ راست نشر کیا۔

امریکی فوجی نے خود پر تیل چھڑکتے ہوئے، آگ لگانے سے پہلے کہا تھا، "میں اب نسل کشی میں ملوث نہیں رہوں گا،” اس کے بعد اس نے ، "آزاد فلسطین” کا نعرہ لگایا۔

اسرائیل کے سفارتخانوں کے سامنے جنگ کے خلاف مسلسل احتجاج کیا جاتا رہا ہے۔ دسمبر میں، جنگ کے خلاف احتجاج کرنے والی ایک خاتون نے اٹلانٹا میں اسرائیلی قونصل خانے کے باہر خود کو آگ لگا لی تھی۔