عمران خان پر بادی النظر میں آفیشل سیکرٹ ایکٹ کا اطلاق ہوتا ہے، اسلام آباد ہائیکورٹ کا تحریری حکم

چیئرمین پی ٹی آئی  کی درخواست ضمانت اور مقدمہ اخراج درخواستیں مسترد کرنے کا تفصیلی فیصلہ جاری  کر دیا گیا ہے۔

اسلام آباد ہائی کورٹ کے چیف جسٹس عامر فاروق نے تفصیلی فیصلہ جاری کیا۔ فیصلے میں کہا گیا ہے کہ  بادی النظر میں پٹیشنر پر آفیشل سیکرٹ ایکٹ کی سیکشن فائیو کا اطلاق ہوتا ہے۔

فیصلے میں کہا گیا کہ چیئرمین پی ٹی آئی کی ضمانت اور مقدمہ اخراج کی درخواستوں میں دلائل تقریباً ایک جیسے ہونے کے باعث ایک ساتھ سنا گیا، ضمانت کی درخواستوں پر عمومی طور پر فیصلہ فوری سنا دیا جاتا ہے، اس کیس میں چونکہ وکلاء کے دلائل 8 گھنٹوں سے زائد پر محیط تھے اس لیے دونوں درخواستوں پر فیصلہ محفوظ کیا گیا۔

فیصلے میں کہا گیا کہ درخواست گزار وکلاء کے مطابق آفیشل سیکریٹ ایکٹ کا اطلاق صرف مسلح افواج کے افسران پر ہوتا ہے، آفیشل سیکریٹ ایکٹ کے سیکشن 1 سب سیکشن 2 کے تحت اس کا اطلاق پاکستان کے ہر شہری اور حکومتی عہدیداروں پر ہوتا ہے، استغاثہ کا مقدمہ ہے کہ سائفر درخواست گزار پر بھروسہ کرکے ان کو سونپا گیا تھا۔

عدالتی آرڈر میں مزید کہا گیا کہ استغاثہ کے مطابق درخواست گزار نے بطور وزیر اعظم سائفر کی معلومات کو حاصل کیا۔