اکاؤنٹس منجمد، پی آئی اے ملازمین کی تنخواہیں ادا نہ کی جا سکیں

پی آئی اے افسران وملازمین کی رواں ماہ کی تنخواہیں تاحال ادانہیں کی جاسکیں،سیلریزمزید التوا کا شکارہوسکتی ہیں۔

ذرائع کا کہنا ہے کہ ایف بی آر کی جانب سے اکاونٹس منجمد ہونے کے سبب پی آئی اے کے گروپ ایک تا چارملازمین اورافسران کو رواں ماہ کی تنخواہیں اب تک ادانہیں کی جاسکیں جبکہ گروپ چار سے اوپرکے افسران کی تنخواہیں بھی التوا کا شکارہیں۔

فیڈرل ایکسائز ٹیکس کی وصولی کے معاملے پرایف بی آر نے چند روزقبل قومی ائیرلائن کے اکاونٹس منجمد کردیے تھے،ذرائع کا کہنا ہے کہ اکاونٹس کی بندش کا تصفیہ ہونے کے باوجود قومی ائیرلائن انتظامیہ کے پاس ملازمین کو تنخواہوں کی ادائیگی کے لیے رقم موجود نہیں ہے۔

مذکورہ رقم کا بندوبست کسی سرکاری ادارے سے کیا جارہا ہے،واضح رہے کہ پی آئی اے اسٹاف کی تنخواہوں کا حجم ایک ارب 10کروڑ روپے کے لگ بھگ ہے،گذشتہ ماہ سول ایوی ایشن اتھارٹی نے ملازمین کی تنخواہیں اداکرنے کے لیے رقم لی گئی تھی۔