ملک کو نقصانات سے بچانے کے لیے غیرقانونی معاشی سرگرمیوں کے خلاف کارروائیاں پوری قوت سے جاری رہیں گی، آرمی چیف

پاک فوج کے سربراہ جنرل عاصم منیر نے کہا ہے کہ ملک کو درپیش معاشی نقصانات سے نجات دلانے کے لیے غیر قانونی سرگرمیوں کے خلاف قانون نافذ کرنے والے اداروں کی متعلقہ سرکاری محکموں کے ساتھ مل کر کارروائیاں پوری قوت کے ساتھ جاری رہیں گی۔

آئی ایس پی آر کے مطابق آرمی چیف جنرل عاصم منیر نے جمعرات کو لاہور کا دورہ کیا اور صوبائی اپیکس کمیٹی کے اجلاس میں شرکت کی۔

آئی ایس پی آر کے مطابق اپیکس کمیٹی اجلاس میں نگراں وزیر اعلیٰ محسن نقوی بھی شریک ہوئے، آرمی چیف کو صوبے کی سکیورٹی صورتحال سمیت بجلی،گیس چوری، ذخیرہ اندوزی اور غیر ملکی کرنسی کی سمگلنگ کے خلاف قانون نافذ کرنے والے اداروں کے اقدامات کے بارے میں بریفنگ دی گئی۔

فورم کو اقلیتوں کے تحفظ کے لیے کیے گئے اقدامات اور صوبے کے کچے کے علاقے میں آپریشنز کی پیش رفت کے بارے میں بھی بریفنگ دی گئی جبکہ فورم نے غیرقانونی غیرملکی شہریوں کی وطن واپسی کا بھی جائزہ لیا۔

آرمی چیف نے اجلاس میں زور دیا کہ غیر قانونی سرگرمیوں کے خلاف قانون نافذ کرنے والے اداروں کی کارروائیاں متعلقہ سرکاری محکموں کے ساتھ مل کر پوری قوت کے ساتھ جاری رہیں گی تاکہ پاکستان کو مختلف طریقوں سے ہونے والی چوریوں کی وجہ سے درپیش معاشی نقصانات سے نجات مل سکے۔

فورم کو خصوصی سرمایہ کاری سہولت کونسل(ایس آئی ایف سی) اور گرین پنجاب کے اقدامات پر جاری پیشرفت سے بھی آگاہ کیا گیا اور آرمی چیف نے تاریخی اقدامات کے اثرات سے فائدہ اٹھانے کے لیے تمام متعلقہ محکموں کے درمیان ہم آہنگی کی ضرورت پر زور دیا۔

اجلاس کے شرکا نے اس بات کا اعادہ کیا کہ ریاستی ادارے، سرکاری محکمے اور عوام صوبے کی ترقی اور خوشحالی کے لیے متحد ہیں۔