سٹاک مارکیٹ میں مسلسل مندی کے بعد ہفتے کے آخری روز مثبت اختتام، سونے کی قیمت میں 1300 روپے فی تولہ اضافہ

چار روز کی مسلسل مندی کے بعد آج ہفتے کے آخری کاروباری دن پاکستان اسٹاک ایکسچینج میں مارکیٹ کا اختتام مثبت زون میں ہوا۔

کاروبار کے اختتام پر مارکیٹ 79 پوائنٹس اضافے کے ساتھ بند ہوئی، صرافہ بازار میں سونے کی قیمت میں اضافہ دیکھا گیا جبکہ روپے کے مقابلے ڈالر کی قیمت میں معمولی کمی نظر آئی۔

مسلسل چار روز منفی رہنے والی اسٹاک مارکیٹ ہفتے کے آخری کاروباری دن مثبت زون میں بند ہوئی، کاروبار کے اختتام پر کے ایس سی 100 انڈیکس 79 پوانٹس اضافے کے ساتھ 63 ہزار 282 پوانٹس پر بند ہوا۔

اسٹاک مارکیٹ میں کاروبار کا آغاز مثبت انداز میں ہوا، ایک وقت پر مارکیٹ 63 ہزار 911 پوائنٹس کی سطح پر بھی ٹریڈ ہوئی۔

پی ایس ایکس میں آج مجموعی طور پر 339 کمپنیوں کے حصص میں کاروبار ہوا، 160 کمپنیوں کے شئیرز کی قیمتوں میں اضافہ جبکہ 158 کے حصص کے داموں میں کمی ہوئی۔

آج مارکیٹ میں سرمایہ کاری کی مالیت 9 ارب 30 کروڑ روپے سے زائد رہی اور 28 کروڑ 66 لاکھ شئیرز کا کاروبار ہوا۔

سرمایہ کاروں کے مطابق پاک ایران کشیدگی میں کمی اور مثبت معاشی اشاریوں کے اثرات مارکیٹ پر دیکھے گئے، تاہم انتخابات تک مارکیٹ میں ملا جلا رجحان رہنے کا امکان ہے۔

مقامی صرافہ مارکیٹ میں سونے کی قیمتوں میں 1300 روپے فی تولہ اضافہ ہوا اور فی تولہ سونے کی قیمت 2 لاکھ 15 ہزار روپے تک جاپہنچی، دس گرام سونا 1115 روپے اضافے سے 1 لاکھ 84 ہزار 328 روپے کا ہوگیا۔

عالمی مارکیٹ میں فی اونس سونا 13 ڈالرز اضافے سے 2045 ڈالرز کا ہوگیا۔چاندی کی فی تولہ قیمت 2 ہزار 600 روپے پر مستحکم رہی۔

انٹر بینک میں کاروبار کے اختتام پر روپے کے مقابلے میں ڈالر 8 پیسے سستا ہوگیا ، انٹر بینک میں ڈالر 279.98 سے کم ہوکر 279.90 پر بند ہوا۔