روٹی کے بعد بیکری آئٹمز کی قیمت میں بھی کم ہوگی، وزیر خوراک پنجاب

پنجاب حکومت روٹی کی قیمت کم کرنے کے بعد بیکری مصنوعات کی قیمتوں میں کمی کیلئے سرگرم ہوگئی، صوبائی وزیر بلال یاسین کی زیرصدارت بیکری آئٹمز کی قیمتوں میں کمی کیلئے اجلاس ہوا۔ اجلاس میں سیکرٹری خوراک پنجاب، ڈی جی فوڈ اتھارٹی، ڈی جی انڈسٹریز، ڈپٹی کمشنر لاہور،بیکری ایسوسی ایشن اور 21 مشہور برانڈز کے نمائندوں نے شرکت کی۔

وزیر خوراک پنجاب نے کہا کہ ڈبل روٹی، رس اور بن کی قیمتوں میں خاطر خواہ کمی کی جائے،2 ماہ میں گندم، آٹے اور میدے کی قیمتوں میں 30 سے 48 فیصد تک کمی ہوئی،روٹی اور نان کی قیمتوں میں کمی کرائی، بیکری مصنوعات کی قیمتیں بھی ہر صورت کم ہوں گی۔

بلال یاسین نے بتایا کہ برانڈز نے قیمتوں میں کمی کیلئے پیر تک مشاورت کا وقت مانگا ہے،اسٹیک ہولڈرز کو 27 مئی تک قیمتوں میں رضاکارانہ کمی کا وقت دیا گیا ہے،بیکری مصنوعات اور بسکٹ برانڈز کی قیمتوں میں رضاکارانہ طور پر کمی کریں، پیر کو انتظامیہ کےساتھ بیٹھ کر بیکری آئٹمز کی قیمتوں میں کمی کا تعین ہوگا۔

وزیرخوراک پنجاب نے کہا کہ پنجاب بھر میں انتظامیہ کم قیمتوں پر بیکری مصنوعات کی دستیابی یقینی بنائے گی،عوام تک سستی اور معیاری خوراک کی فراہمی کیلئے ہر ممکن اقدامات اٹھا رہے ہیں۔