بنگلہ دیش میں سپریم کورٹ کے گھیراؤ کے بعد چیف جسٹس بھی مستعفی

بنگلہ دیش کے چیف جسٹس عبید الحسن نے ہفتہ کو مظاہرین کی جانب سے سپریم کورٹ کا گھیراؤ کرنے اور انہیں ایک گھنٹے کے اندر مستعفی ہونے کا الٹی میٹم دینے کے بعد اپنے عہدے سے مستعفی ہونے کا فیصلہ کیا ہے۔ مظاہرین نے خبردار کیا تھا کہ اگر وہ مستعفی نہ ہوئے تو وہ سپریم کورٹ کے ججوں اور چیف جسٹس کی رہائش گاہوں پر دھاوا بولیں گے۔

چیف جسٹس نے میڈیا کو بتایا کہ انہوں نے ملک بھر میں سپریم کورٹ اور نچلی عدالتوں کے ججوں کے تحفظ کو مدنظر رکھتے ہوئے استعفیٰ دینے کا فیصلہ کیا ہے۔ انہوں نے کہا کہ وہ ہفتہ کی شام تک اپنا استعفیٰ صدر محمد شہاب الدین کو بھیج دیں گے۔

تازہ احتجاج اس خبر کے سامنے آنے کے بعد شروع ہوا کہ چیف جسٹس نے فل کورٹ اجلاس طلب کر لیا ہے۔ طلباء اور وکلاء سمیت سینکڑوں مظاہرین نے سپریم کورٹ کی طرف مارچ کیا اور اس کے احاطے پر قبضہ کر لیا۔ سپریم کورٹ کی حفاظت کے لیے فوج کے جوان بھی تعینات تھے۔

مظاہرین نے دعویٰ کیا کہ چیف جسٹس عبوری حکومت کو غیر قانونی قرار دینے کی سازش رچ رہے ہیں۔

مظاہرے میں شریک ایک شخص مقدم نے ڈیلی سٹار کو بتایا، "فاشسٹ عبوری حکومت کو غیر قانونی قرار دینے کے لیے سپریم کورٹ اور چیف جسٹس کو استعمال کرنے کی کوشش کر رہے ہیں۔ اسی لیے ہم چیف جسٹس کو مستعفی ہونے پر مجبور کرنے کے لیے سپریم کورٹ کے احاطے میں آئے،”۔

عبوری حکومت کے مشیر قانون آصف نذر نے کہا کہ عبید الحسن کے بارے میں کئی تنازعات ہیں اور وہ مبینہ طور پر عوامی لیگ کے مختلف رہنماؤں کی رہائش گاہوں پر رہے جب وہ بیرون ملک گئے تھے۔

عبوری حکومت کی وزارت کھیل کے مشیر آصف محمود نے بھی "چیف جسٹس عبید الحسن کے غیر مشروط استعفیٰ” اور فل کورٹ میٹنگ کو منسوخ کرنے کا مطالبہ کیا۔

رپورٹ میں کہا گیا کہ کشیدگی کے درمیان چیف جسٹس نے ججز کی میٹنگ ملتوی کر دی۔

پیر کو حسینہ نے بنگلہ دیش کی وزیر اعظم کے عہدے سے استعفیٰ دے دیا اور ملک سے فرار ہو گئیں۔ نوبل امن انعام یافتہ محمد یونس کی قیادت میں عبوری حکومت تشکیل دی گئی ہے۔