ایئرلائنز کو غیرملکی پائلٹس پر انحصار کم کرنے پر مجبور کیا جائے، ایئرکرافٹ اونرز کا وزیر ہوابازی کو خط

جنرل سیکریٹری پاکستان ائیرکرافٹ اونرزآپریٹرزایسوسی ایشن نے کہا ہے کہ ائیرلائنزانشورنس کے پیسے بچانے کے لیے پائلٹس کو تربیت کے لیے اپنی ائیرلائنوں میں شامل نہیں کررہیں۔

پاکستان ائیرکرافٹ اونرزآپریٹرایسوسی ایشن کی جانب سے وزیرہوابازی کو خط لکھا گیا ہے، سیکریٹری جنرل کیپٹن عاصم نوازکا کہناہے کہ نئے پائلٹس کے کمی کی وجہ سے غیرملکی پائلٹس کی خدمات لینی پڑتی ہے، غیرملکی پائلٹوں کی پاکستانی ائیرلائنوں میں شمولیت سے بین الاقوامی کرنسی میں زرمبادلہ کی صورت تنخواہ اداکرنی پڑتی ہے۔

خط میں کہا گیا کہ پائلٹس کی تربیت کی کمی کو کم کرنے کے لیے فلائنگ اسکولوں سے مدد حاصل کی جاسکتی ہے، ملکی ائیرلائنز کو ریگولیٹر کے ذریعے مجبور کیا جائے کہ وہ غیر ملکی پائلٹس پرانحصار کم کریں، مستقبل کے لیے پائلٹس کی کمی کو پورا کرنے کے لیے کیڈٹ پائلٹس کے طور پر نئے گریجویٹوں کا 25% کوٹہ رکھاجائے۔