علی امین گنڈاپور تھانہ بنی گالا فائرنگ کیس میں بری

وزیراعلیٰ خیبرپختونخواعلی امین گنڈا پور کو تھانہ بنی گالا میں درج فائرنگ کے مقدمے میں بری کردیا گیا۔

اسلام آباد کے سول جج قدرت اللہ نے علی امین گنڈا پور سمیت تمام ملزمان کو بری کردیا۔ بیرون ملک ہونے کے باعث مدعی کا آن لائن بیان لیا گیا۔

مدعی مقدمہ عامر زمان اپنے وکیل رضوان اعظم عباسی کے ہمراہ عدالت کے روبرو پیش ہوئے، مدعی نے بتایا کہ وقوعے میں زخمی ہونے والا بندہ ملک سے باہر ہے۔

عدالت نے ہدایت کی کہ اس کی سکایب آئی ڈی دیں،عدالت نے سکائپ کے ذریعے فائرنگ کے نتیجے میں زخمی ہونے والے شخص کا بیان ریکارڈ کرانے کی ہدایت کی۔

مدعی کے وکیل نے کہا کہ علی امین گنڈا پور 109 کی حد تک تھے، ان سے کمپرومائز ہوچکا ہے،نامزد ملزمان کو بھی معاف کردیا ہے۔

عدالت کی جانب سے بیرون ملک ہونے کے باعث متاثرہ شخص محمد ولید کا آن لائن بیان لیا گیا۔ عدالت نے محمد ولید سے استفسار کیا کہ اس مقدمے میں آپ نے راضی نامہ کرلیا ہے۔

ولید نے بیان دیا کہ جی میں نے فی سبیل اللہ معاف کردیا ہے۔