علی مردان ڈومکی بلوچستان کے نگران وزیراعلیٰ نامزد

بلوچستان کے نگران وزیراعلیٰ کے لیے میر علی مردان خان ڈومکی کے نام پر اتفاقِ رائے ہو گیا ہے جس کے بعد گورنر بلوچستان ملک عبدالولی کاکڑ نے ان کی تقرری کی منظوری دے دی ہے۔

وزیراعلیٰ اور قائد حزبِ اختلاف کے درمیان نگران وزیراعلیٰ کے لیے ایک نام پر اتفاق نہ ہونے کے بعد یہ معاملہ چھ رکنی پارلیمانی کمیٹی کے پاس تھا جہاں کثریتِ رائے سے میر علی مردان کے نام کی منظوری دی گئی ہے۔

علی مردان ڈومکی نواب اکبر خان بگٹی کے نواسے اور سابق سینیٹر میر حضور بخش ڈومکی کے بیٹے ہیں۔ ان کا نام جمعیت علمائے اسلام کی جانب سے پارلیمانی کمیٹی کو تجویز کیا گیا تھا۔

سپیکر جان محمد خان جمالی کی جانب سے تشکیل کردہ چھ رکنی پارلیمانی کمیٹی میں حال ہی میں تحلیل ہونے والی صوبائی اسمبلی میں حکومت اور اپوزیشن کے تین، تین رہنما شامل تھے۔