لاہور کے سکولوں میں درجہ چہارم کی بھرتیوں میں مبینہ کرپشن، آڈیٹر جنرل نے نوٹس لے لیا

سکولوں میں درجہ چہارم اور 17 اے رولز کے تحت بھرتیوں میں مبینہ کرپشن کا آڈیٹر جنرل پنجاب لاہور ریجن نے سختی سے نوٹس لیا ہے۔

آڈیٹر جنرل پنجاب لاہور ریجن نے ڈسٹرکٹ ایجوکیشن اتھارٹی لاہور کو مراسلہ لکھ کر ریکارڈ کی عدم دستیابی اور عملے کے عدم تعواون پر شدید تحفظات کا اظہار کیا ہے۔

آڈیٹر جنرل لاہور ریجن کی طرف سے ڈسٹرکٹ ایجوکیشن اتھارٹی لاہور کے چیف ایگزیکٹو کے نام  جاری مراسلے میں کہا گیا ہے کہ ان کے دفتر کے افسر اور عملہ آڈٹ میں دلچسپی نہیں لے رہا اور آڈٹ کے لیے درکار ریکارڈ بھی مہیا نہیں کیا گیا۔

مراسلے میں کہا گیا ہے کہ آڈٹ کے لیے مقررہ وقت کی کمی کے باعث آڈٹ میں دشواری ہے، اپنے افسروں اور عملے کو تاکید کریں کہ وہ ریکارڈ کی فراہمی اور دوران آڈٹ اپنی موجودگی یقینی بنائیں۔

مراسلے میں جو ریکارڈ طلب کیا گیا ہے اس میں مشتہر کی گئی اسامیوں کا اشتہار، امیدوار کی درخواست کی نقل جس پر متعلقہ افسر کی جانب سے ڈائری نمبردرج ہو،ادارہ جاتی سلیکشن کمیٹی کے منٹس اور میرٹ لسٹ شامل ہے۔

اس کے علاوہ ملازمت کی پیشکش کا لیٹر، امیدواروں کے میڈیکل فٹنس سرٹیفیکیٹ، جوائننگ رپورٹ، جوائننگ قبول کئے جانے کی رپورٹ ، کیریکٹر/ حاضری کی تصدیق کا ریکارڈ بھی طلب کیا گیا ہے۔