امیر بالاج کا قتل، گوگی بٹ کے گھر چھاپہ، حملہ آور مظفر کے دوسرے فون سے اہم شواہد مل گئے

لاہورکے علاقہ  چوہنگ  میں بالاج ٹیپو کے قتل کے بعد پولیس نے خواجہ عقیل عرف گوگی بٹ کے گھر چھاپہ مارا لیکن گوگی بٹ اور اس کے گن مین چھاپے سے پہلے فرار ہو چکے تھے، حملہ آور مظفر حسین کی بیوی کو زیر حراست رکھا گیا ہے جس نے اہم انکشافات کئے ہیں۔

ذرائع کے مطابق پولیس نے کینال روڈ پر نجی ہاوسنگ سوسائٹی خواجہ عقیل عرف گوگی بٹ کی گرفتاری کے لیے چھاپہ مارا،چھاپےسے قبل  گوگی بٹ اور اسکے گن مین فرار ہوگئے۔

ذرائع کا کہنا ہے کہ گوگی بٹ کے موبائل فون کی لوکیشن دوبارہ لی جارہی ہے، پولیس ٹیموں نے لاہور سے باہر بھی چھاپے مارے۔

امیر بالاج پر حملہ کرنے والے مظفر حسین کی بیوی کو پولیس نے حراست میں لے رکھا ہے، جس نے اہم انکشافات کئے ہیں۔ انویسٹیگیشن پولیس نے حملہ اور کا دوسرا موبائل فون بھی قبضے میں لے لیا۔ حملہ آور دوسرے موبائل سے گوگی بٹ کے ساتھ رابطے میں تھا۔

پولیس ذرائع کے مطابق زیر حراست خاتون نے بتایا کہ مظفر حسین 25 سال  سے  گوگی  بٹ کا ذاتی ملازم ہے۔

فون ڈیٹا کے مطابق واردات کے روز حملہ آور نے گوگی بٹ سے متعدد  بار رابطہ کیا، حملہ آور مظفر پہلے بھی گوگی بٹ کے کہنے پر مجرمانہ کاروائیاں کرتا رہا ہے،ملزم مظفر نے اپنے بہنوئی کو بھی گولیاں ماری تھی۔

پولیس ذرائع کے مطابق حملہ آور مظفر کی چار شادیاں ہیں اور مختلف مقدمات میں جیل کاٹ چکا ہے،رابطہ ثابت ہونے پر  گزشتہ رات پولیس نے گوگی بٹ کے گھر چھاپہ مارا،چھاپے کے دوران چار گن مین کو حراست میں لے لیا۔